Қозоғистонда 13 августдан бошлаб сунъий йўлдош орқали интернет хизматини тақдим этувчи Starlink расман ишга тушди. Бу ҳақда мамлакат Рақамли ривожланиш вазирлиги хабар берди.
Вазирлик маълумотларига кўра, Starlink технологияси энг олис ва етиб бориш қийин ҳудудларда ҳам барқарор интернетни таъминлайди ҳамда аҳолига замонавий рақамли хизматлардан фойдаланиш имконини яратади. Маълумот учун, 12 июнь куни Рақамли ривожланиш вазирлиги ва Starlink ўртасида компаниянинг Қозоғистон қонунчилигига риоя қилиши бўйича келишув имзоланган эди.
“Мамлакатда ҳануз бориш қийин бўлган ҳудудлар — яйловлар, тоғли қишлоқлар, узоқдаги корхоналар мавжуд бўлиб, Starlink уларга интернет олиб киришда муҳим рол ўйнайди”, деди Рақамли технологиялар вазири Жаслан Мадиев.
Ҳозиргача Starlink Қозоғистонда фақат синов (пилот) режимида ишлаган ва юқори тезликдаги интернетдан асосан қишлоқ мактаблари фойдаланаётган эди. Эндиликда эса хизмат барча фойдаланувчилар учун очиқ бўлади.
Starlink — бу АҚШдаги SpaceX компанияси (Илон Маск асос солган) томонидан 2015 йилда ишлаб чиқилган ва бошқариладиган сунъий йўлдош интернет тизими. Ундан мақсад дунёнинг исталган нуқтасида, ҳатто энг олис ва инфратузилмасиз ҳудудларда ҳам юқори тезликдаги интернет тақдим этиш саналади. Интернет тезлиги — одатда 50–250 Мбит/с оралиғида бўлади.
Изоҳ (0)