АҚШ президенти Дональд Трамп Гарвард университетида таҳсил олаётган чет эллик талабаларнинг маълумотини сўради. У Truth Social ижтимоий тармоғига тегишли постни жойлаштирди.
Нима учун Гарвард ўз талабаларининг деярли 31 фоизи чет эллик эканини айтмаяпти? Уларнинг баъзилари АҚШ билан дўстона муносабатда бўлмаган мамлакатлардан бўлишига қарамай, бу давлатлар ўз фуқаролари таълими учун ҳеч қандай маблағ ажратмайди ва ажратишни ҳам ўйламайди. Буни бизга ҳеч ким айтмаган!
Биз Гарвардга миллиардлаб доллар бераётганимиз сабабли ўша чет эллик талабаларнинг кимлигини ва қайси мамлакатлардан эканини билишни истаймиз.
АҚШ президенти бу ўринли талаб экани, бироқ Гарвард университети бу маълумотларни очиқлашга шошилмаётганини айтди.
Биз ўша талабаларнинг исмлари ва келиб чиққан мамлакатларини билмоқчимиз. Гарварднинг 52 миллион доллари бор, шуни сарфласин ва Федерал ҳукуматдан грант ажратишни давом эттиришини сўрашни бас қилсин!, деди Трамп.
Апрель ойида Гарвард университети профессорлари Трамп маъмуриятини федерал молиялаштиришни текшириш билан таҳдид қилгани учун судга берганди. Кейинроқ Трамп маъмурияти Гарвард учун 2,2 млрд долларлик грантларни музлатиб қўйди.
22 май куни АҚШ ички хавфсизлик вазири Кристи Ноэм Гарвард университети энди хорижий талабаларни қабул қилиш ҳуқуқидан маҳрум этилишини айтди. У ҳозирда Гарвардда таҳсил олаётган барча хорижликлар бошқа олийгоҳларга ўтиши кераклигини таъкидлади.
Вазир тахминига кўра, Гарвард талабаларининг чорак қисмидан кўпроғи янги университет қидиришга мажбур бўлади. Трамп бошқа университетлар учун ҳам хорижий талабаларни қабул қилишга тақиқ жорий қилиниши мумкинлигини айтди.
Маъмурият Гарвардни зўравонликни ва антисемитизмни қўзғатиш ҳамда Хитой Коммунистик партияси билан алоқалар ўрнатишда айбдор деб ҳисоблайди, деди Кристи Ноэм.
23 май куни АҚШдаги суд Гарвардга нисбатан қўйилган хорижий талабаларни қабул қилиш тақиқини вақтинча тўхтатиб турди. Гарвард университети Трамп маъмуриятига қарши 10 банддан иборат даъво аризаси киритди. Улар орасида маъмурий тартиб-қоидалар тўғрисидаги қонун (APА) ҳамда АҚШ конституциясининг сўз ва йиғилиш эркинлиги ҳақидаги биринчи тузатиши бузилиши мавжуд.
Аввалроқ Оқ уй АҚШ университетларидан яҳудий миллатига мансуб талабаларни ҳимоя қилишни талаб қилган ва бунга амал қилинмаса, молиявий ёрдамни қисқартириш билан таҳдид қилганди.
АҚШ олий таълим муассасаларида Исроилга қарши норозилик намойишлари давом этмоқда. Намойишлар Ғазога уюштирилган ҳужумлар, оқибатда тинч аҳоли орасида қурбонлар сони ортиб бориши, гуманитар вазият оғирлашгани, АҚШнинг Исроилга қуроллар сотаётгани билан боғлиқ.
Изоҳ (0)