CNN телеканалинининг ўз манбаларига таяниб хабар беришича, Покистон ва Ҳиндистон замонавий авиация тарихидаги энг йирик ва энг узоқ давом этган ҳаво жангни ўтказган. Маълум бўлишича, 125 та жанговар самолёт тахминан бир соатдан ортиқ ўзаро кураш олиб борган. Шунга қарамай, ҳеч бир томон ўз ҳаво ҳудудини тарк этмаган, баъзи ракета зарбалари эса 160 километрдан ортиқ масофадан амалга оширилган, деб ёзади манба.
Покистон хавфсизлик хизматининг CNN билан суҳбатлашган юқори мартабали вакили 2019 йилдан сўнг томонлар бир-бирининг ҳаво ҳудудига нисбатан эҳтиёткорлик билан ёндаша бошлаганини билдирган. Ўшанда покистонлик учувчи ҳиндларнинг МиГ-21 қирувчисини уриб туширганди.
“Шундан бери ҳеч ким яна таҳқирланишни хоҳламайди”, дейди CNN манбаси.
Айни шу боис бу сафарги жангда ҳам томонлар ўз ҳаво ҳудудидан чиқмай ҳаракат қилиб, узоқ масофадан “ҳаво-ҳаво“ ракеталари учириш билан чекланган.
“Тутдек тўкилган” ҳинд самолётлари
7 майга ўтар кечаси Ҳиндистон “Синдур операцияси” номли амалиёт ўтказиб, Кашмирнинг Исломобод назоратидаги ҳудудларига зарба берди. Натижада мамлакатнинг ўнлаб фуқаролари ҳалок бўлди.
Бироқ Покистон ҳаво мудофаа тизимлари ҳужумда қатнашган ҳинд самолётларининг бир қанчасини тутиб олди. Исломобод улар орасида учта Рафале, битта Су-30 ҳамда яна бир МиГ-29 қирувчиси борлигини маълум қилди. Кейинроқ тармоқларда уриб туширилган самолётларга тегишли қисмлар тасвирлари тарқалди. OSINT таҳлилчилари уларни ўрганиб, покистонликларнинг даъволарини қисман тасдиқлади.
Маълум бўлишича, Покистон ҳаво жангларида Хитойдан сотиб олинган Ж-10 қирувчилари ҳамда ПЛ-15Э “ҳаво-ҳаво” ракеталарини қўллаган. Бу хабар ортидан Ченгду Aircraft Corporation акциялари кескин кўтарилди. Боиси юқорида қайд этилган самолёт айнан ушбу компания томонидан ишлаб чиқарилади.
Хитой компаниясининг акциялари нархи ошган бўлса, Дассаул Рафале билан бунинг акси юз берди. Боиси у ҳинд ҳарбийлари “Синдур операцияси“да қўллаган Рафале қирувчи самолётларининг ишлаб чиқарувчиси ҳисобланади. Покистон кучлари томонидан уриб туширилгани айтилган учта самолётдан бири визуал далиллар билан тасдиқланди.
2016 йили Ҳиндистон Франция билан 36 та Рафале қирувчисини сотиб олиш учун 8,8 млрд долларлик шартнома имзолади. Бу ҳиндлар ҳар бир ҳаво борти учун ўртача 244 млн доллардан тўлашини англатади. Жорий йилда Деҳли ҳарбий денгиз кучлари учун 26 та Рафале М модификацияларини сотиб олиш бўйича келишувга эришди. Бу сафар уларнинг ҳар бири 285 млн доллардан тушди.
Француз самолётларининг бу қадар қимматлигини шартнома нафақат қирувчилар, балки ўқ-дори ва эҳтиёт қисмлари, техник хизмат кабиларни ҳам кўзда тутиши билан изоҳлаш мумкин.
Изоҳ (0)