Исроил ҳарбий ҳаво кучлари қўмондонлиги 970 нафар ходими, шу жумладан, учувчиларни қуролли кучлар сафидан бўшатиш билан таҳдид қилмоқда. Маҳаллий Haaretz нашрининг хабар беришича, бунга уларнинг Ғазо секторидаги урушга қарши баёнотни имзолагани сабаб қилиб кўрсатилган.
Маълум қилинишича, ҳарбий-ҳаво кучларининг захирадаги ва хизматда бўлган учувчилари, зобитлари ва аскарлари Ғазодаги ҳарбий ҳаракатларга қарши чиқиб, урушни тугатишни талаб қилган хатга имзо чекишган. Улар уруш сиёсий манфаатлар йўлида олиб борилаётганини таъкидлаган.
Шундан сўнг Исроил ҳарбий-ҳаво кучлари раҳбарияти имзо эгалари билан шахсий суҳбатлар ўтказиб, уларни фикридан қайтишга чақирган. Қайсарлик қилиб туриб олганлар эса огоҳлантирилиб, ишдан бўшатилиши айтилган. Таҳдидлар сабаб фақат 25 нафар хизматчи фикридан қайтган, яна 8 нафари эса аксинча, рўйхатга қўшилиш истагини билдирган.
Баёнот муаллифлари орасида ҳарбий-ҳаво кучларининг юқори мартабали учувчилари ҳам бор. Улар Ғазодаги ҳарбий ҳаракатлар Исроил хавфсизлигига эмас, бош вазир Биньямин Нетаньяхунинг сиёсий манфаатларига хизмат қилмоқда, дея ҳисоблайди.
Нашрнинг ёзишича, бир неча кун аввал Исроил ҳарбий-ҳаво кучлари қўмондони генерал майор Томер Бар имзо эгаларининг баъзилари билан учрашган. Учрашувда захирадаги офицерлар Барни танқид қилиб, бундай таҳдидлар ҳарбийларнинг сиёсий фикр билдириш ҳуқуқини бузаётганини билдирган.
Қайд этилишича, 19 март куни икки нафар ҳарбий-ҳаво кучлари ва ҳарбий разведка хизматидан жами икки киши жанг қилишдан бош тортгани учун армиядан бўшатилган.
Исроил томони март ойи бошида эълон қилган тўлиқ блокададан буён Ғазо секторига гуманитар ёрдам тўхтаган. Озиқ-овқат захиралари тугаб бормоқда.
Изоҳ (0)