Исроил ҲАМАСнинг ўт очишни тўхтатиш таклифини маъқуллади

Исроил расмийси ҲАМАСнинг ўт очишни тўхтатиш таклифини асосли деб атаб, уни маъқуллагандек бўлди. Бу ҳақда Arab News хабар берди.

Яҳудий давлати ушбу таклифни қабул қилган-қилмаганини аниқ айтмаган ва қўшимча тафсилотларни очиқламаган. ҲАМАС эса 24 июль куни эрта тонгда берган баёнотида ўт очишни тўхтатиш таклифини воситачиларга юборганини тасдиқлаган.

Исроилнинг бу қарорга келишига унинг дунё ҳамжамияти томонидан Ғазода очлик келтириб чиқаришда айбланаётгани сабаб бўлган. Хусусан, сўнгги кунларда дунёнинг 100 дан ортиқ хайрия ва ҳуқуқни ҳимоя қилиш ташкилотлари Исроилнинг блокадаси ва давом этаётган ҳарбий ҳужуми Ғазо секторини очарчилик сари етаклаётганини даъво қилаётганди.

Маълумот ўрнида, Ғазо секторида бугун, 24 июль куни Исроил ҳужумлари сабаб умумий 17 киши ҳалок бўлди. Хусусан, уларнинг 3 нафари гуманитар ёрдам олишга уринаётган фаластинликлар эди. Бундан ташқари, Ал-Мавосий шаҳрида 2 нафар, анклав марказида эса яна 8 нафар фаластинлик қурбон бўлган. Wаfа ахборот агентлигининг хабар беришича, Ал-Хадер шаҳарчасида 15 ва 17 ёшли икки фаластинлик ўлдирилган.

Босиб олинган Ғарбий Соҳилда 25 нафар фаластинлик ҳибсга олинди

Исроил қўшинлари босиб олинган Ғарбий Соҳилдаги бир қатор шаҳар ва қишлоқларга бостириб кириб, 24 июль тонгидан бери 25 нафар фаластинликни ҳибсга олди. Уларнинг ҳудудлар бўйича тақсимоти қуйидагича:

• Байт Уммар шаҳрида 10 нафар;
• Идҳна шаҳрида 2 нафар;
• Дура Ал-Қари шаҳрида 3 нафар;
• Рамаллаҳ шаҳрида 1 нафар;
• Ал-Мазраа Аш-Шарқия қишлоғида 5 нафар;
• Наблус шаҳрида 4 нафар.