Тошкент вилояти Тошкент туманида икки тадбиркор газдан ноқонуний фойдаланиб келаётгани аниқланди. Бу ҳақда 29 июль куни “Ҳудудгазтаъминот” АЖ хабар берди.
Маълум қилинишича, Ўзбекистон бўйлаб табиий газдан ноқонуний фойдаланиш ҳолатларини аниқлаш ва уларни олдини олиш бўйича рейдлар ўтказилмоқда. Ана шундай тадбирлардан бири Тошкент вилоятида уюштирилган.
Ўранишлар натижасида Тошкент туманида жойлашган “И.С.С.” МЧЖга қарашли мебел ишлаб чиқариш корхонасида қоидабузарлик аниқланган. Истеъмолчи газ таъминот идораси билан шартнома тузмасдан ёнилғидан ўзбошимчалик билан фойдаланиб келаётган бўлган.
“Ҳолат юзасидан далолатнома тузилиб, дастлабки ҳисоб-китобларга кўра, 1 миллиард 134 миллион сўмлик зарар аниқланди”, дейилади манбада.
Яна бир қоидабузарлик туманнинг “Чинор” МФЙда жойлашган “Д.Д.А.” ЯТТга қарашли овқатланиш масканида фош этилган. Бинода ҳисоблагичдан ташқари резина шланг орқали тармоққа уланиб, табиий газдан ноқонуний фойдаланиб келинаётгани маълум бўлган. Мазкур ҳолат бўйича 137 миллион сўмлик зарар қайта ҳисоб-китоб қилинган.
Юқоридаги ноқонуний ҳолатларга ҳужжатлар ҳуқуқни муҳофаза қилувчи органларга топширилган.
Бош прокуратура 2025 йил январь—июнь ойларида ёқилғи-энергетикадан фойдаланишда 67 мингдан ортиқ ноқонуний ҳолатлар аниқланиб, 758 млрд сўм зарар ундирилганини хабар қилганди.
Изоҳ (0)