Ўзбекистонда экологияга етказилган зарар учун жаримани ошириш таклиф қилинмоқда. Депутат Алишер Қодиров бу ҳақдаги қонунга эътирозлар борлигини билдирди.
“Миллий тикланиш” партияси раиси Алишер Қодиров қатор муаммоларни ҳал қилмасдан олдин жарималарни кўпайтириш нотўғри эканини айтди.
“Шаҳар ичида суғориш, дренаж тизимлари йўқ, лекин дарахтларни суғориш керак. Крандан суғорилса, жарима ёзиляпти. Масалан, ҳаво 50-55 даража иссиққа чиқяпти. Шаҳар ичида яшайдиган аҳолига крандан бошқа сув келадиган манба йўқ. Лекин ундан фойдаланса, нотўғри фойдаланиляпти, деб жарима ёзиляпти. Улар нима қилиши керак? Кўзи билан кўриб туриши керакми дарахтлар қуришини? Шароит яратмасдан жазони кучайтириб қўймаяпмизми?
Шаҳардаги маҳаллаларда чиқиндини олиб чиқиб кетиш тизими бир ҳафтада бир марта келади. Етти куннинг ичида олти кун одамлар чиқиндисини қаерга йиғиши керак? Ўзига маданиятни олиб, шакллантирган одамлар амаллаб бир жойга йиғади. Кимлардир оляпти-да, лекин шаҳарда кўчага ташлаб кетиб қоляпти. Биз уларни ушлаймиз, ҳозир энди бу қонун бўйича жазолаймиз. Биз шароит яратиб бермадик-ку ҳали. Одамлардан экологик маданиятни талаб қиляпмиз, тўғри. Талаб қилаётганларнинг ўзи олдин шароит яратиб бериб қўйиш деган масъулиятини бажариб қўйиши керак эмасми”, дея фикр билдирган депутат.
Алишер Қодиров атроф-муҳитни асраш, экомаданият — ҳаётий эҳтиёж сифатида тарбия билан сингдирилиши кераклигига урғу берган.
“Шундай эмаслиги учун дарахтни кесиш ва суғоришни бир тоифадаги ҳуқуқбузарлик сифатида ўйлай оламиз. Экологияга етказилган зарар учун жаримани кўпайтириш таклиф қилинаётган қонун лойиҳасига эътирозларимиз бор”, деган парламент вакили.
Аввалроқ депутат дарахтлар кесилиши масаласида ҳам фикр билдирганди. Унинг айтишича, дарахтлар зарурат юзасидан кесилиши мумкин бўлиши керак.
Изоҳ (0)