Суперлиганинг 20-туридан ўрин олган Жиззахда бўлиб ўтган “Сўғдиёна” – “Динамо” учрашуви якунлангач, Самарқанд клуби ҳакамлик билан боғлиқ қарорлар юзасидан расмий шикоят аризаси киритган. 21 август, чоршанба жамоа айнан қайси эпизодлар бўйича эътирози борлигини аниқлаб, Лига раҳбариятига расмий хат йўллади. Бу ҳақда ЎзПФЛ матбуот хизмати хабар берди.
Клубнинг шикоят киритиш жараёни “Суперлига ва Пролига регламенти”да белгиланган қоидаларга тўлиқ мувофиқ бўлган. Яъни, учрашув тугагач, 30 дақиқа ичида қайдномага расмий шикоят киритган. 24 соат ичида эса эътироз билдирилган эпизодлар тафсилотлари алоҳида хатда тақдим этилган.
Қуйида “Динамо” клубининг эътирози билдирилган асосий эпизодлар келтирилади:
- 3-дақиқа — Анваржон Ҳожимирзаевнинг Иванович томонидан жарима майдончаси ичида тўхтатилиши;
- 9-дақиқа — Санжар Қодирқуловга ҳакам томонидан кўрсатилган огоҳлантириш;
- 11-дақиқа — Ҳожимирзаевга нисбатан ишлатилган қўполликка бош ҳакамнинг реакцияси;
- 31-дақиқа — Франциско Феррейра ва Суҳроб Иззатов ўртасидаги курашга нисбатан ҳакам қарори;
- 75-дақиқа — “Сўғдиёна” футболчиси Нодиржон Сойибовнинг майдондан четлатилмаслиги;
- 90+6-дақиқа — “Динамо” дарвозасига пенальти белгиланиши.
Лига мутахассислари ушбу вазиятларни ўрганиб чиқиб, айрим ҳолатларда уларда ҳам саволлар пайдо бўлганини маълум қилди. Эндиликда, “Динамо” клубининг шикоятига асосланган ҳолда, Ўзбекистон Футбол Ҳакимлари Маркази (ЎзФҲМ) томонидан расмий тушунтириш берилиши талаб этилади.
Лига ҳакамларни ўқитиш, тайинлаш, баҳолаш ёки жазолаш ваколатига эга эмас. Бироқ, учрашувларда ҳакамлар фаолияти билан боғлиқ барча харажатлар Лига томонидан қопланади. Айнан шу асосда, клублардан ҳакамлик юзасидан шикоятлар келиб тушгач, Лига ЎзФҲМ раҳбариятидан расмий изоҳ талаб қилади, дея қўшимча қилинади ЎзПФЛ баёнотида.
Маълумот учун, 20 август, чоршанба куни бўлиб ўтган “Сўғдиёна” — “Динамо” учрашувида 1:1 ҳисоби қайд этилган.
Изоҳ (0)