“Супер оила-3” ва “Бошқотирма” асосидаги сериал: Disney ва Pixar янги мультфильмлар трейлерини эълон қилди (видео)

9 август куни бўлиб ўтган D23 Fan Expo кўргазмасида Disney компанияси Pixar “Супер оила-3” устида иш бошлаганини эълон қилди. Мультфильмни дастлабки икки қисмнинг сценарий муаллифи ва режиссёри бўлган Бред Бёрд суратга олади.

Шу билан бирга, ушбу кўргазмада яқин йилларда катта экранларда намойиш этиладиган бошқа лойиҳалар ҳам тақдим этилди. Жумладан, “Муфаса: қирол шер” фильмининг катта трейлери кўрсатилди.

Тақдимотни актёр Дуэйн Жонсон ва Ауля Кравалёлар очиб беришди. Улар “Моана” мультфильмининг бош қаҳрамонларига овоз беришган. Актёрлар анимацион фильмнинг давоми 27 ноябрда чиқишини эълон қилди:

“Лило ва Ститч” кино адаптациясининг премьераси 2025 йилнинг ёз фаслида бўлиб ўтади. Бош ролни Майа Килоа ижро этган. Зак Галифианакис Жамба образига ва Билли Магнуссен Пикли образига овоз берган.

“Ўйинчоқлар тарихи-5”га келсак, фильмни аввалги барча қисмларнинг сценарий муаллифи ва “Немони излаб” фильми режиссёри Эндрю Стентон суратга олади. Мультфильмдаги гаджетлар ва замонавий технологиялар ёвуз қаҳрамонлар ролига киради. Франшизанинг янги қисми 2026 йилнинг ёзида намойиш этилиши режалаштирилган.

Шунингдек, Pixar студияси ўзининг “Ғалаба ё мағлубият” деб номланган илк сериали устида иш бошлаганини эълон қилди. Унинг премьераси 6 декабрга белгиланган.

Яна бир кўп қисмли сериал муваффақиятли “Бошқотирма” лойиҳаси асосида суратга олинади ва “Тушлар студияси” (Dream productions) деб аталади. Унда Райлининг ҳар кеча рўёбга чиқадиган тушлари ҳақида ҳикоя қилинади. Инсайдерлар маълумотига кўра, сериал 2025 йилнинг баҳорида чиқиши кутилмоқда. “Музюрак-3” анимацион фильмининг премьераси эса 2027 йилга мўлжалланган.

Бундан ташқари, кўргазмада “Оппоғой” фильми янги талқинининг биринчи тизери ҳам намойиш этилди, унда Рейчел Зеглер бош қаҳрамон, Гал Гадот эса ёвуз аёл ролини ижро нетади. Фильм премьераси 2025 йил 21 мартда бўлиб ўтади.

Кейинги йилда янги ва оригинал мультфильмлар премьераси ҳам бўлиб ўтади. 2026 йилда “Hoppers” анимацион фильми чиқади. Унда робот қундуз ичига кириб қолган ва ҳайвонлар дунёсини ноодатий тарзда ўрганадиган қиз ҳақида ҳикоя қилинади.

Шунингдек, “Юлдузлар жанги: Асосий жамоа” сериалининг трейлери ҳам тақдим этилди. Шоу премьераси 3 декабрь куни Disney+ да бўлиб ўтади.