Америкалик миллиардер Илон Маск ўз партиясини тузиш режаларини вақтинча тўхтатди. Бу ҳақда манбаларга таяниб, The Wall Street Journal хабар берди.
Маскнинг ҳамкорларига кўра, миллиардер ўз эътиборини компанияларига қаратмоқчи. У республикачилар партиясидан овозларни олиб қўйиши мумкин бўлган учинчи партияни тузиб, “таъсирчан республикачиларни” норози қилишни истамайди.
Маск 20 август куни Х ижтимоий тармоғида: “WSJ ёзганларнинг ҳеч бирини ҳақиқат деб қабул қилмаслик керак, дея изоҳ қолдирган.
У сўнгги пайтларда АҚШ сенатори Жей Ди Венс билан кўп мулоқот қилмоқда ва агар Венс 2028 йилда президентликка номзодини қўйса, уни қўллаб-қувватлаш учун молиявий ресурсларидан фойдаланиши мумкин. Шунга қарамай, Маск янги партия тузиш имкониятини расман рад этмаган. Тарихан учинчи партиялар кўпинча икки асосий партиянинг овозларини қўлга киритиб келган.
Нега Маск партия тузишни ўйлади?
Дональд Трампнинг иккинчи президентлик муддати бошида Маск ташаббуси билан Ҳукумат самарадорлиги департаменти (DOGE) тузилган эди. Бироқ май охирида миллиардер ваколатлари тугагани учун давлат лавозимини тарк этди.
Июнь ойида Маск Трампнинг “катта гўзал қонун” лойиҳасини кескин танқид қилиб, у бюджет дефицитини янада оширишини айтди. Шунингдек, кейинги сайловларда демократларни қўллаб-қувватлаши мумкинлигини билдирди. Бунга жавобан Трамп унга “жуда жиддий муаммолар” бўлишини айтди, аммо Маск кейинчалик ярашув билан чиқди.
Можаро 1 июлда яна кескинлашди. Хусусан, Трамп Tesla ва Маскнинг бошқа компанияларига ажратилган субсидияларни текшириш билан таҳдид қилди.
4 июль куни, АҚШ Мустақиллик куни, Маск Х тармоғида “Америка партиясини тузишимиз керакми?” деган сўровнома ўтказди. Унга бир суткада 1,3 миллиондан ортиқ киши овоз берди. Уларнинг 65 фоизи “икки партиявий тизимдан мустақиллик” ғоясини қўллаб-қувватлади.
“2 га 1 нисбат: сиз янги сиёсий партия хоҳлайсиз — ва сиз уни оласиз! Мамлакатимиз исрофгарчилик ва коррупция сабаб банкротлик ёқасида турганда, биз демократияда эмас, бир партияли тизимда яшаяпмиз”, дея натижага изоҳ берди Маск
6 июль куни эса АҚШ Федерал сайлов комиссиясига “Америка партияси”ни рўйхатдан ўтказиш ҳужжатлари топширилгани маълум бўлди. Бироқ уларни айнан Маскнинг ўзи топширганми, номаълумлигича қолди.
Изоҳ (0)