Microsoft 2 июль куни 9 мингг яқин ходимларини ишдан бўшатаётганини маълум қилди. Бу ҳақда CNN хабар берди.
Бу қарор сўнгги ойларда эълон қилинган қисқартиришларнинг учинчиси ҳисобланади. Microsoft акциялари эълондан кейин ўзгаришсиз қолди. Ходимлар сонининг қисқариши компания умумий ишчиларининг 4 фоизидан камроғига таъсир қилади. Технологик гигант 2023 йилда ҳам 10 000 нафар ходимни ишдан бўшатган эди.
“Биз компания ва жамоани динамик бозорда муваффақиятга эришиш учун ташкилий ўзгаришларни амалга оширишда давом этамиз”, деди Microsoft вакили.
Компания баёнотида бошқарув қатламлари қисқартирилиб, ходимлар янги технологиялар билан таъминланаётгани қўшимча қилинган.
Қисқартиришларга Microsoft ўз ишчи кучини янада самарали қилиш учун сунъий интеллектдан фойдаланаётгани ҳам сабаб бўлмоқда. Компания бош директори Сатя Наделла 2025 йил бошида компания дастурлашининг 20-30 фоизи сунъий интеллект томонидан яратилганини айтган. Сунъий интеллектга миллиардлаб сармоя киритилаётгани ҳам маълум қилинган.
Компания май ойида ўз ходимларининг 3 фоизини, тахминан 7000 нафар ходимни ишдан бўшатганди. 2024 йил июль ҳолатига кўра, компанияда 228 минг ходим иш билан таъминланган. Microsoft апрель ойида булутли бизнес ва сунъий интеллект сабаб 3 ой ичида чораклик фойдаси 18 фоизга ошиб, 25,8 миллиард долларга етганини маълум қилган. Компания тўртинчи молиявий чорак учун даромадларини шу ойнинг охирида эълон қилиши кутилмоқда.
Бу йил бошқа технологик компаниялар, жумладан Меtа ва Bumble ҳам ходимлар қисқартирилишини амалга оширган. Амазон раҳбари Энди Жесси июнь ойида сунъий интеллект охир-оқибат ходимлар сонини камайтиришга сабаб бўлиши ҳақида огоҳлантирганди.
Изоҳ (0)