Тошкентда собиқ Астрономия парки ўрнида гул боғи ташкил этилади
Тошкентнинг Юнусобод туманидаги собиқ Астрономия парки ўрнида замонавий гул боғи ташкил этилади. Бу ҳақда жамоатчилик муҳокамаси учун эълон қилинган тегишли қарор лойиҳасида кўзда тутилган.
Унда айтилишича, бу Тошкент шаҳри аҳолиси ва ташриф буюрувчи меҳмонларга манзарали боғлардан баҳраманд бўлишлари учун шарт-шароит яратиш ҳамда уларга сифатли хизмат кўрсатиш, шунингдек, ҳукуматнинг 2021 йил 31 августдаги қарори ижросини таъминлаш мақсадида амалга оширилади. Ушбу қарорда Тошкент шаҳрининг ҳар бир туманида аттракционлардан ҳоли бўлган кичик истироҳат боғларини барпо этиш белгиланган.
Ҳужжат лойиҳасида келтирилишича, 6 гектар ер майдонида жойлашган собиқ Астрономия парки ўрнида ташаббускор тадбиркорларни жалб қилган ҳолда замонавий гул боғини ташкил этиш бўйича лойиҳа таклифи ишлаб чиқилиб, маъқулланган.
Гул боғи ҳудуди очиқ танлов ғолибига гул боғини барпо этиш ва сақлаш мажбуриятларини ўз маблағлари ҳисобидан амалга ошириш шартларида 30 йил муддатга ижарага берилади.
Тошкент шаҳар ҳокимлиги гул боғи ҳудудини ҳатловдан ўтказиб, хусусий мулклар мавжуд бўлган тақдирда мавжуд турар ва нотурар жой объектларини мулкдорлар билан очиқ муҳокамани ташкил этиб, ер майдонларини ўрнатилган тартибда компенсация тўловларини қоплаб берган ҳолда белгиланган тартибда ҳокимлик захирасига олиб, давлат рўйхатидан ўтказади.
Қурилиш вазирлиги билан Юнусобод тумани, Астрономия кўчасида замонавий гул боғи ташкил этилиши режалаштирилган ҳудуд чегарасини аниқлаб, тасдиқлайди.
Кадастр агентлиги билан буюртмага асосан ер участкасини ажратиш материаллари тайёрлаб, замонавий гул боғини барпо этиш учун ажратади.
