Тошкент вилоятида Lacetti каналга тушиб кетди

Тошкент вилояти Тошкент туманида 4 апрель куни Lacetti автомобили каналга тушиб кетди. Бу ҳақда Фавқулодда вазиятлар вазирлиги хабар қилди.

Қайд этилишича, шу куни соат 11:22 да туман ФВБга «Кўктерак» маҳалласидан оқиб ўтувчи Захариқ каналига Lacetti автомобили ҳайдовчининг эҳтиётсизлиги ва эътиборсизлиги оқибатида тушиб кетгани ҳақида хабар келиб тушган.

Шунга кўра, айтилган манзилга ФВВ қутқарувчилари етиб бориб, махсус техника ва асбоб-анжомлар ёрдамида автомобилни каналдан олиб чиққан.

Ҳодиса оқибатида тан жароҳати олган ва ҳалок бўлганлар йўқ.

Аввалроқ Самарқандда Damas ҳайдовчиси каналга тушиб кетгач, бедарак йўқолгани хабар қилинганди. Шунингдек, Наманганда каналга тушиб кетган автомобиль сув тубидан олиб чиқилгани ва Наманганда Nexia каналга тушиб кетгани хабар қилинган.