Қозоғистонда мажбурий мактаб формаси бекор қилинди
Қозоғистонда 2021/2022-ўқув йилида ўрта таълим муассасаларида мактаб формаси мажбурий бўлмайди. Бу ҳақда Қозоғистон таълим ва фан вазири Асхат Аймагамбетов Facebook’даги саҳифасида эълон қилди. Ўқувчилар классик услубдаги кийимда дарсларга қатнашиши мумкин.
Вазирлик қарори мавжуд карантин чекловлари ва пандемия пайтида форма сотиб олишнинг савдо марказларида навбатлар келтириб чиқаришини, шунингдек, мамлакатдаги иқтисодий қийинчиликлар туфайли айрим оилалар бюджетига жиддий юк бўлишини истамаслик билан изоҳланди.
«Барча ижобий ва салбий томонларини тарозига солиб, биз турли шароитларда уни сотиб ололмайдиганлар учун мактаб формаси кийишни ихтиёрий қилишга қарор қилдик. Келгуси ўқув йили мобайнида болалар мактабга вақтинча нафақат мактаб формасида, балки классик услубдаги кийимда ҳам бориши мумкин »,— деб ёзади вазир.
Ўтган ўқув йили арафасида ҳам вазирлик худди шундай қарорни эълон қилганди, лекин аксарият қозоғистонлик мактаб ўқувчилари сентябрдан майгача масофавий шаклда таълим олди. 2021 йил май ойида республика ўқитувчилар кенгашида Аймагамбетов «келаси йил ҳам масофавий шаклда ўқитилса, Қозоғистон таълим тизими омон қолмаслигини» айтди.
Июль ойида мамлакат президенти «ҳукуматга янги ўқув йилида ўқувчилар ва талабаларнинг анъанавий форматга қайтишини таъминлаш тўғрисида кўрсатма берди».
2 август куни Таълим ва фан вазирлигида маълум қилинишича, ўқув шакли тўғрисида қарор коронавирус тарқалишининг олдини олиш бўйича идоралараро комиссия, мамлакат бош давлат санитария шифокори ва ҳудудларнинг бош санитария врачлари томонидан қабул қилинган.
Бундан олдин вазирлик қуйидаги тавсияларни ишлаб чиққан эди: болалар ва мактаб ишчиларининг ҳароратини ўлчаш, биноларни дезинфекция қилиш, ўқув муассасаларини дезинфекцияловчи воситалар билан таъминлаш, ўқув жараёнини ижтимоий масофага мувофиқ ташкил этиш, бино сиғими ва ўқувчилар сонига қараб иш тартиби ва сменаларни аниқлаш.
Эслатиб ўтамиз, 2020/2021-ўқув йилида Ўзбекистондаги давлат мактабларида мажбурий мактаб формаси талаб этилмаганди. Халқ таълими вазири Шерзод Шерматов ўқувчилар белгиланган умумий тартибга риоя қилган ҳолда мактабга ўзи истаган кийимида келиши мумкинлигини айтган.
Мавзуга доир:
