Ўзбекистонда август ойидан бошлаб COVID-19’га қарши ўзбек-хитой вакцинаси ишлаб чиқарилади. Бу ҳақда Инновацион ривожланиш вазирлиги матбуот хизмати хабар берди.
Хабар беришларича, вакциналарни ишлаб чиқаришни йўлга қўйиш юзасидан музокара ўтказиш мақсадида 24 июль куни инновацион ривожланиш вазири Иброҳим Абдураҳмонов, Фармацевтика тармоғини ривожлантириш агентлиги директори Сардор Кариев ва Jurabek Laboratories компанияси вакиллари, шунингдек, Хитойнинг Anhui Zhifei Longcom Biopharmaceutical компанияси бош муҳандиси Ван Чжи Сзюн, хорижий мамлакатларга экспорт қилиш бўлими директори Чен Фан У ҳамда бошқалар иштирокида учрашув бўлиб ўтган.
«Хитойлик ҳамкорлар Ўзбекистоннинг фармацевтик маҳсулотларни ишлаб чиқариш салоҳияти билан дастлабки танишувлари натижасида коронавирусга қарши вакцина ишлаб чиқаришнинг инфратузилмавий имкониятларига юқори баҳо берди. Компаниянинг бош муҳандиси Ван Чжи Сзюн Ўзбекистоннинг ишлаб чиқариш қувватлари мазкур вакцинани ишлаб чиқариш талабларига тўлиқ мувофиқ эканлигини таъкидлади», — дейилади вазирлик ахборотида.
Учрашувда Хитой компанияси билан вакциналарни ишлаб чиқаришни йўлга қўйиш бўйича меморандум имзоланган. Жумладан, Ўзбекистонда вакцина ишлаб чиқариш учун Хитой томонидан хом ашё етказиб бериш муддатлари ва ҳажми борасида дастлабки келишувларга эришилган. «Томонлар Ўзбекистонда биринчи босқичда ойига 10 миллион доза вакцина ишлаб чиқариш ва кейинчалик бу кўрсаткични йилига 200 миллион дозага қадар олиб чиқиш мумкинлиги бўйича фикр алмашди», — дейилади хабарда.
Аввалроқ Россия президенти Владимир Путин ва Шавкат Мирзиёев ўртасида бўлиб ўтган мулоқотда коронавирусга қарши вакциналар ишлаб чиқариш бўйича қўшма қувватларни тез фурсатда ишга тушириш масалалари муҳокама қилингани ҳақида хабар берилган эди.
Изоҳ (0)