Бош прокурор Ниғматилла Йўлдошев Тошкент бозорларидаги нархлар ва маҳсулот билан таъминланиш даражасини ўрганди
Ўзбекистон Президенти томонидан берилган топшириқлар ижроси доирасида расталарни маҳсулотлар билан тўлдириш, деҳқон бозорлари ва йирик савдо объектларида ярмаркалар ташкил этиш, уларга маҳсулотларни арзонлаштирилган нархларда етказиб бериш борасида ишлар аҳволи бош прокурор томонидан жойларга чиққан ҳолда ўрганилмоқда. Бу ҳақда Бош прокуратура ахборот хизмати хабар берди.
Маълум қилинишича, бош прокурор Ниғматилла Йўлдошев ва Бош прокуратура ҳузуридаги Иқтисодий жиноятларга қарши кураш департаменти бошлиғи Дилшод Раҳимов 24 декабрь куни Тошкент шаҳрининг «Миробод», «Аския», «Чилонзор», «Фарҳод» ва «Эски жўва» деҳқон бозорларида бўлиб, мавжуд аҳвол билан яқиндан танишди.
Қайд этилган бозорларда бошқа барча ҳудудлардаги каби Янги йил байрами муносабати билан арзонлаштирилган байрам ярмаркалари ташкил этилган. Жумладан, ўрганилган 5 та бозордаги нарх-навонинг барқарорлигини таъминлаш учун жами 15 нафар прокуратура ва департамент органларининг ходимлари бириктирилган.
Ярмаркаларга Сурхондарё, Хоразм, Андижон, Фарғона, Қашқадарё вилоятларининг 50 та фермер ва деҳқонлари ҳамда қарийб 100 нафар улгуржи савдо ҳамда ишлаб чиқариш корхоналари номма-ном бириктирилиб, уларга 350 та раста ажратилган.
«Ушбу деҳқон бозорларида ҳафта бошидан буён 30 турдаги 2586 тонна озиқ-овқат маҳсулотлари арзонлаштирилган нархларда сотилган бўлиб, 267 тонна гўшт, 7,6 миллион донадан ортиқ тухум, 722 тонна картошка, 160 тонна шакар, 136 тонна гуруч аҳолига ҳамёнбоп нархда етказиб берилиши таъминланган.
Бундан ташқари, балиқ, консерва, салқин ва спиртли ичимликлар, сут маҳсулотлари, мевалар, шу жумладан, цитруслар ҳамда турли ширинликлар савдоси ҳам йўлга қўйилган», — дейилади Бош прокуратура хабарида.
Қайд этилишича, ички истеъмол бозорида асосий турдаги озиқ-овқат маҳсулотлари нархининг барқарорлигини таъминлаш ҳамда белгиланган вазифаларни тизимли равишда давом эттириш тўғрисида бош прокурор томонидан масъулларга аниқ кўрсатма ва топшириқлар берилди.
Мавзуга доир:
