Франциялик эркак мол-мулкининг бир қисмини Эрмитаждаги мушукларга мерос қилиб қолдирди. Бу ҳақда музей директори Михаил Пиотровскийга таяниб, Esquire хабар берди.

Фото: «РИА Новости»

«Мушуклар ҳақида қайғуришни тўхтатганимиз йўқ, уларга ҳатто ташриф буюрувчилар ва интернет фойдаланувчилари ҳам ғамхўрлик қилмоқда. Мушукларнинг ўз меценатлари бор: яқинда франциялик эркак мушукларимизга яхшигина суммани мерос қилиб қолдирди — ҳозирда юристлар билан ёзишмалар олиб бормоқдамиз», — дейди у.

Музей ходимлари мушукларга қолдирилган мерос ҳақида ёзда хабар топган, ҳозирда барча ҳужжатларни расмийлаштириш жараёнлари якунланмоқда.

Музей ходимлари Франция фуқароси нима сабабдан бу каби қарорга келгани ва у Петербургда бўлган ёки бўлмаганини аниқлай олмаган. Эрмитаждагиларнинг тахминича, меценат «оддий камтар инсон».

Пиотровскийнинг таъкидлашича, музей сайтида мушукларга хайрия қилиш имконини берадиган алоҳида тугма йўқ, бироқ ривожланиш бўлими билан боғланилса, улар расмийлаштириш жараёнлари ҳақида маълумот бериши мумкин.

Эслатиб ўтамиз, 2018 йилда Италияда Жерри лақабли мушукка ўз хўжайинидан 30 минг евро мерос қолган эди.