Коронавирусдан соғайган россиялик хонандалар Лев Лешенко ва Игорь Николаевга уйига жавоб берилди

Россиялик хонандалар Лев Лешенко ва Игорь Николаевларга коронавирусдан соғайганидан сўнг уйларига жавоб берилди, деб хабар берди «Комсомольская правда».

Лешенко 6 апрель куни коронавирусга қайта тест топширган ва натижа салбий чиққанидан кейин уйига жавоб берилганини айтган. Хонанда ҳазил тариқасида «шифокорлар икки ҳафтадан кўпроқ касалхонадасиз, энди уйингизга боринг, деб айтди» — деган.

Бундан ташқари, Лешенко ўпка шамоллашидан сўнг асоратларини текшириш мақсадида компьютер томографиясидан ўтган. Хонанданинг тўлиқ соғайиб кетиши учун уч ҳафта талаб қилинади. Унда ўпканинг икки томонлама яллиғланиши кузатилган.

Шунингдек, Коммунаркадаги шифохонадан хонанда ва бастакор Игорь Николаевга ҳам жавоб берилган. У клиникада коронавирус ташхиси билан бир ярим ҳафта даволанди.

Николаев Лешенкода коронавирус аниқланишидан бир кун аввал у билан тадбирда кўришгани учун касалхонага ётқизилган эди. У пневмонияни бошдан кечирди. Коронавирусга қайта тест топширган ва натижалар Николаевнинг соғайганини кўрсатган.

78 ёшли хонанда Лев Лешенко коронавирус пневмониясига чалингани ҳақида 27 март куни хабар берилган эди.