Вазирлар Маҳкамасининг 2019 йил 7 январдаги «Давлат ва хўжалик бошқаруви органлари ҳамда маҳаллий давлат ҳокимияти органлари ходимларининг жисмоний тарбия ва спорт билан мунтазам шуғулланишини ташкил этиш чора-тадбирлари тўғрисида»ги 6-сонли қарорига мувофиқ Жисмоний тарбия ва спорт вазирлиги танлов ўтказиб, ғолибларни аниқлади.
«Ташкилотларнинг барча бўлинмалари миқёсида ташкил этилган соғломлаштириш, жисмоний тарбия ва спорт машғулотларини мунтазам равишда ўтказганлиги учун» номинациясида Тошкент вилояти томонидан тавсия этилган «Maxam-Chirchiq» аксионерлик жамияти ғолиб, деб топилди. Ташкилот 100 баллик тизимда 85 балл жамғарди. Навоий вилоятидан тавсия этилган Навоий кон-металлургия комбинати жамоаси эса 65 балл билан иккинчи бўлди. Кучли учликни Қашқадарё вилояти номзоди якунлаб берди.
«Аҳолининг кенг қатламлари ўртасида оммавий спортни ривожлантириш, оммавий спорт тадбирларини ташкил этганлиги учун» номинациясида ғолиблик учун вазирликнинг ҳудудий бошқармалари кураш олиб борди. Бунда 1-ўринни 65 балл билан Тошкент шаҳар жисмоний тарбия ва спорт бошқармаси эгаллаган бўлса, кучли учликдан Қашқадарё ва Хоразм вилоятлари жой олди.
2019 йил якунлари бўйича танлов ғолиблари «Жисмоний тарбия ва спорт аълочиси» кўкрак нишони ҳамда Ўзбекистон Республикасида ўрнатилган энг кам иш ҳақининг 50 баравари миқдорида пул мукофотлари билан тақдирланади. Ғолибларни тантанали тақдирлаш маросими эса яқин кунларда вазирлик биносида ўтказилади.
Изоҳ (0)