Андижонда санитария-эпидемиология назорати маркази ходими 4 минг доллар пора билан ушланди

ДХХ Андижон вилояти бошқармаси ходимларининг вилоят прокуратураси билан ҳамкорликда тезкор тадбир ўтказди. Бу ҳақда ДХХ матбуот хизмати «Дарё»га хабар берди.

Тезкор тадбир давомида Давлат санитария-эпидемиология назорати марказининг Балиқчи туман бўлимида ҳуқуқшунос бўлиб ишловчи «М.Ф.» прокуратура идоралари томонидан тумандаги МЧЖлардан бирининг мансабдор шахсларига нисбатан қўзғатилган жиноят иши бўйича терговга чақиртирилмаслиги ва чора кўрилмаслиги эвазига маҳаллий фуқародан 4 минг АҚШ доллари олаётган вақтида ушланди.

Аниқланишича, Балиқчи туман прокуратураси томонидан ҳеч қандай ҳужжатларсиз жамоатчи ходим сифатида ишга жалб қилинган «М.Ф.» атрофдагиларга ўзини прокурорнинг жамоатчи ёрдамчиси сифатида таништириб келган.

Ҳозирда ушбу ҳолат юзасидан вилоят прокуратураси томонидан Жиноят кодексининг 168 (Фирибгарлик), 28 (Жиноят иштирокчиларининг турлари), 211-моддалари (Пора бериш) билан жиноят иши қўзғатилиб, тергов ҳаракатлари доирасида мазкур ишга алоқадор бўлган бошқа шахсларни аниқлаш бўйича зарур чора-тадбирлар кўрилмоқда.