«Дарё» мухбири Азизбек Абдувалиев «Тошкент — Томчи» авиарейси йўлга қўйилиши муносабати билан Қирғизистоннинг Ўзбекистондаги элчихонаси томонидан Иссиқкўлга ташкилланган медиатурда бўлиб қайтди. Қуйида унинг сафар таассуротлари билан танишасиз.
Ўзбекистон сайёҳлар сони бўйича пешқадам
Ўзбекистон ўтган йили Қирғизистонда дам олган сайёҳлар сони бўйича Россия ва Қозоғистонни ортда қолдириб, биринчи ўринга чиқиб олди. Қирғизистон маданият, ахборот ва туризм вазирлигининг туризм департаменти директори Мақсад Дамир ўғлига кўра, 2018 йилда уларнинг сони 3 миллион 295 минг кишини ташкил этган.
— Биз ўзбекистонлик сайёҳларни жалб этиш устида мунтазам иш олиб бормоқдамиз. Қирғиз томони Ўзбекистон фуқароларини мамлакатдаги соғломлаштириш муассасаларига таклиф этишдан манфаатдор, — деди у «Тошкент — Томчи» авиарейси тикланишига бағишланган матбуот анжуманида.
Масофа ва менталитетлар яқинлиги, кўплаб чегара постлари очилгани, аввалдан яқин ўзаро борди-келдилар бунга салмоқли ҳисса қўшяпти. Табиийки, Қирғизистонга дам олиш учун боришни режалаштирган сайёҳларимизнинг аксарияти Иссиқкўлни танлайди.
Иссиқкўлга қандай бориш мумкин?
Шахсий ёки ёлланган авто. Оилавий дам олиш истагида бўлганлар учун энг мақбул вариант бўлса ажаб эмас. Йўлларда муаммосиз ёқилғи ғамлаб олиш мумкин. Автомобилдан кейинчалик Иссиқкўлда сайр-саёҳатлар учун ҳам фойдаланса бўлади. Ортиқча тўхташлар бўлмаса 12—14 соатда етиб борасиз.
Автобус. Одатда катта гуруҳ бўлиб борганда танладиган вариант. «Тошкент» автовокзалидан ҳар куни иккита автобус Бишкекка йўл оляпти. Чипта нархи бир томонга 120 минг сўм, 12 соат атрофида йўл босилади. Бишкекдан сўнг Иссиқкўлгача такси, автобус, йўналишдаги такси ёки поездда етиб олиш мумкин, тўрт соат чамаси йўл.
Яхши томони — кўпчилик билан зерикмайсиз. Рейсларга қўйилаётган автобуслар ҳам шинам, телеқурилмалар билан жиҳозланган. Минус томони —Қозоғистон чегарасида автобуслар соатлаб туриб қолганига гувоҳ бўлдик. Тирбандлик, автобус синчиклаб кўздан кечирилади, ҳар бир йўловчи ҳужжатлар тўлдиради ва ҳоказо.
Поезд. Ёз мавсумида ҳафтада бир марта «Тошкент—Балиқчи» йўналишида поезд қатнови йўлга қўйилган. Давлат чегараларидан ўтишини ҳисобга олган ҳолда Балиқчигагача бир суткадан ошиқроқ юради.
Аниқроқ айтадиган бўлсак, Тошкентдан пайшанба кунлари соат 20.50 да жўнаб, Балиқчи шаҳрига маҳаллий вақт билан соат 23.30 да етиб боради. Бу ердан Иссиқкўлгача қўл узатса етгудек.
Чипта нархи плацкарт, купе ёки люкс вагон танланишига қараб 300 минг сўмдан бошланади. Поездда вагон-ресторан бор.
Самолёт. Энг қулай, бироқ қимматроқ вариант. Тошкентдан Бишкекка учиб, у ердан Иссиқкўлга етиб олиш ёки тўғридан-тўғри ҳафтада бир қатнайдиган «Тошкент—Томчи» йўналишига авиачипта олиш мумкин. Томчи аэропорти Иссиқкўлнинг ўзида жойлашган, чипта нархи бир томонга 130 доллар.
Тошкентдан Иссиқкўлгача масофа 850 километр атрофида. Таққослаш учун, Тошкентдан Нукусгача бўлган масофа машҳур қўшиқда айтилгани каби — 1100 километрдан ошиқ. Чипта нархи 545 минг сўм, валютага ўгирганда 65 доллар атрофида.
Тўғри, маҳаллий ва халқаро йўналиш деган тушунчалар бор, лекин икки баробар фарқ барибир тушунарсиз. Балки бундан икки йил аввал йўлга қўйилган илк «Тошкент—Томчи» авиарейси кўп ўтмай бекор қилинишига ҳам шу сабаб бўлгандир?
Иссиқкўлда қаерга жойлашса бўлади?
Бу энди хоҳишингиз ва имкониятларингизга боғлиқ. Иссиқкўлда кунига 5 доллардан 500 долларгача жойлашиш мумкин. Бошлағич нархлар хусусий секторга тегишли. Бу ердаги аксарият хонадонлар ижарага қўяди, ижара нархлари эса яратилган шароитларга (душ, телевизор, кондиционер ва ҳоказо) қараб кўтарилиб бораверади.
Иссиқкўл соҳилларида 200 га яқин пансионат, санаторий, меҳмонхона ва дам олиш марказлари фаолият олиб боради. Улардаги нархлар кунига ўртача 20 доллардан бошланади. Оилавий келган бўлсангиз ёки ёлғизликни истасангиз қимматроқ нархда алоҳида коттедж ёки танхаусга жойлашиш мумкин.
Пансионат ва санаторийларнинг қулай томони — атрофи ўралган ва қўриқланадиган ҳудуд, алоҳида тоза пляж. Табиати ниҳоятда гўзал: оқ қайинлар, арчалар, дарахтларда ўрмалаб юрган олмахонлар.
Иссиқкўлдаги «элитний» санаторийларнинг аксариятида фақат атиргуллар экилган.
Бизда негадир урфдан қолган атиргуллар таратаётган ифордан бош айланади, манзарасидан кўз қувнайди.
Эътибор бериш керак бўлган жиҳат: Иссиқкўлдаги деярли барча дам олиш марказларида нарх-наво мавсумга қараб ўзгаради. Сайёҳлик мавсуми июнь ойи охирида бошланади ва сентябргача давом этади. Шунга қараб нархлар ҳам 1,5, ҳатто икки баравар фарқланади.
Айтайлик, пансионатда кунига 50 доллар турган икки кишилик хона нархи июль ойидан бошлаб 80-100 долларга айланади.
Иссиқкўлда қаерга борган маъқул?
Табиийки, энг гўзал манзара кўлнинг ўзи. Айтматов асарларида мадҳ этилган, ҳатто машҳур қиссадаги каби оқ кемаларни ҳам кузатиш мумкин бўлган кўл.
Дунёнинг майдони бўйича энг катта 25 та кўлидан бири (тузли кўллар орасида эса Каспийдан сўнг иккинчи), чуқурлиги бўйича еттинчи ўринда. Сувининг тиниқлиги жиҳатидан Байкалга таққосланади.
Денгиз сатҳидан 1600 метр юқорида жойлашган, ўртача чуқурлиги 278 метр. Қишда ҳеч қачон музламайди, балки номи ҳам шунга боғлиқдир.
Денгиз ва тоғ иқлими уйғунлиги сабабли об-ҳавоси мў’тадил ва ёқимли, ёз мавсумида ўртача ҳарорат +20 атрофида. Қирғизистонда туризмнинг асосий даромад манбаси, маҳаллий ҳукумат ҳатто кўлни «миллий бойлик» деб эълон ҳам қилган.
Иссиқкўлда ишлаб чиқариш корхоналари йўқ, шу сабаб экологик вазиятдан хавотирланмаса ҳам бўлади.
Чингиз Айтматов номидаги «Руҳ Ўрда» маданий маркази. 2002 йилда Чўлпон-ота шаҳрида очилган, Иссиқкўлда энг кўп ташриф буюриладиган манзиллардан бири.
Антиқа марказ, ҳар соҳадан бир шингил. Қирғиз миллати, энг машҳур қирғиз — Чингиз Айтматов, «Манас» эпоси ҳақида батафсил маълумот олиш мумкин.
Хиёбондаги майсалар ичига яширинган ва сиз тош деб ўйлаган возкучайтиргичлардан қирғиз оқинлари ижросида «Манас»ни тинглайсиз. Турли маданиятларни акс этувчи ҳайкаллар, инсталляцияларга бой.
Ҳудудида дунё динлари — ислом, насронийлик (католик ва православларга алоҳида), буддавийлик ва яҳудийлик шарафига 5 та бино барпо этилган. Шу сабабли бу ер «Беш ибодатхона музейи» деб ҳам аталади.
Халқаро кўчманчилар ўйинлари. Иссиқкўлдаги Чўлпон-ота шаҳрида жойлашган ипподромда 2014 йилдан бери ҳар икки йилда бир Халқаро кўчманчилар ўйинларининг очилиш-ёпилиш маросимлари бўлиб ўтади. Унда иштирокчилар от чопиш, кураш, камондан ўқ узиш каби 20 дан ортиқ этник спорт тури бўйича беллашади.
Илк ўйинларда 19 давлатдан 580 нафар иштирокчи қатнашган бўлса, 2018 йилда ўтказилган учинчи ўйинларга 66 мамлакатдан 1,5 минг нафардан ортиқ спортчи келди.
Қирғизистоннинг собиқ президенти Алмазбек Атамбаев ташаббуси билан йўлга қўйилган ушбу ўйинларни ўтказишдан мақсад кўчманчи халқлар маданиятини сақлаш, этник спорт турларини ривожлантириш эканлиги айтилади. Албатта, Қирғизистоннинг туризм салоҳиятини кўз-кўз қилиш нияти ҳам йўқ эмас.
Табиат қўйнида фаол дам олишни истовчиларга Саричат-Эртош давлат қўриқхонаси, Қоракўл миллий табиат боғи ва Исроилдаги Ўлик денгизга монанд тузли кўл, тошга битилган расмлар—петроглифлари билан машҳур «Орнок» археологик мажмуаси, Григоревск ва Семёновск тоғ дараларига саёҳатни ҳам тавсия этиш мумкин.
Хуллас, келинг, кўринг ва баҳо беринг. Иссиқкўлни биз таърифлашга улгурмаган гўзал жиҳатлари ҳали талайгина...
Изоҳ (0)