Россиялик миллиардерлар таътилни қаерда ўтказмоқчи — Алишер Усмоновнинг яхтаси Италияга қараб йўл олди (фото)

Май ойидаги байрамлар сабаб бу ой Россияда 5 та қўшимча дам олиш куни бўлади. Forbes журналининг аниқлашича, энг қиммат яхталар хорижий портларга қараб йўл олган. Фақатгина биттаси Сочига борган.

Дилбар

Яхтанинг тахминий эгаси: Алишер Усмонов

Баҳоси: 550 миллион доллар

«Менинг Италияга бўлган муносабатим бошқача. Деярли ёз бўйи Сардинияда яшайман», — дейди Усмонов Forbes’га 2018 йил берган интервьюсида.

2005 йилда миллиардер Сардиниянинг энг қиммат ва ҳашаматли дам олиш масканлари яқинида жойлашган Ромаццинода вилла сотиб олган. Бундан аввал Indesit компаниясининг эгаси Антонио Мерлонига тегишли бўлган ушбу виллани Усмонов 35 миллион евро эвазига қўлга киритган. Вилла Ромаццино кўрфазига қарашли кенг парк билан ўраб олинган. Усмонов ногиронларни ташиш учун иккита автобусни тақдим этгач ҳамда маҳаллий футбол жамоасини қўллаб-қувватлаш ва юқори технологияли шифохонани қуриш учун хайрия қилгани учун Арсакен шаҳрининг фахрий фуқароси мақомига эга бўлган.

Eclipse

Яхта эгаси: Роман Абрамович

Баҳоси: 460 миллион доллар

Франциянинг жануби-шарқида жойлашган 3500 дан кам аҳолига эга бўлган Ла-Сьота дунёдаги энг катта ва энг қиммат хусусий яхталарга хизмат кўрсатувчи ва таъмирловчи Европанинг энг йирик денгиз порти унвонига сазовор бўлган, деб ёзади The New York Times. Кемасозлик бу ерда 1800 йиллардан буён амалда. «Парижда Эйфел минораси бор, бизда эса кемасозлик бор», — дейди шаҳар мери Патрик Бор.

Ла-Сьотада, шунингдек, дунёдаги энг қадимий театр «Эдем» ҳам жойлашган. У ерда ака-ука Люмернинг илк песалари намойиш этилган.

Палладиум

Яхта эгаси: Михаил Прохоров

Баҳоси: 155 миллион доллар

Vilanova Grand Marina – Barcelona — суперяхталар учун мўлжалланган Ўртаер денгизидаги биринчи порт. Пристан ҳимояланган портда жойлашган. Тинч ва тоза сув билан таъминланган.

Queen К

Яхта эгаси: Олег Дерипаска

Баҳоси: 70 миллион доллар

Албания, умуман олганда суперяхталар билан машҳур эмас, лекин мамлакатга йилдан йилга кўпроқ хусусий кемалар ташриф буюрмоқда. Греция, Хорватия ва Италияга яқинлиги сабабли, шунингдек, бузилмаган табиий гўзаллиги туфайли Албания «Янги Черногория» деб аталади. Маҳаллий ҳокимият органларининг статистика маълумотларига кўра, 2018 йилда Сарандага 1007 та яхта келган. 2017 йилда эса бу кўрсаткич 842 та эди (яхталарнинг ўлчами статистикада кўрсатилмаган). Афсуски, инфратузилма идеал эмас, лекин Саранда портида суперяхталар учун махсус пристанлар қурилган.

Саранда яқинида жойлашган археологик музей қўриқхона — Бутринт қадимий шаҳрининг харобалари UNESCO’нинг Жаҳон мероси рўйхатига киритилган.