Ўзбекистон Мудофаа вазирлиги, Тошкент шаҳар ИИББ, Мирзо Улуғбек тумани ҳокимлиги ва қатор ташкилотлар ташаббуси билан 6 апрель куни пойтахтнинг «Мовий гумбазлар» хиёбонида ёшлар ва вояга етмаган шахслар ўртасида жиноятчиликнинг олдини олиш мақсадида «Ёшлар жиноятчиликка қарши» фестивали ўтказилди. Бу ҳақда Мудофаа вазирлиги матбуот хизмати «Дарё»га маълум қилди.
Мазкур фестивални ўтказишдан кўзланган мақсад Ўзбекистон Президентининг 2019 йил 19 март кунидаги видеоселектор йиғилишида илгари сурилган ёшлар таълим-тарбияси учун қўшимча шароитлар яратиш, хотин-қизлар бандлигини оширишга қаратилган комплекс чора-тадбирларни ўз ичига олган бешта ташаббусни амалиётга жорий этиш масалаларини ҳаётга татбиқ этишдир.
Кўргазмалар намойиши, куй-қўшиқлар, турли спорт мусобақалари билан ўтказилган бугунги фестивалда 2000 дан зиёд ёшлар иштирок этди.
Мудофаа вазирлиги Марказий ҳарбий оркестри таркиби Амир Темур замонига хос либосларда намоён бўлгани барчани ҳайратга солди. Қуролли Кучлар Марказий ашула ва рақс ансамбли хонандалари томонидан ижро этилган куй-қўшиқлар иштирокчиларга хуш кайфият улашди.
Тадбир доирасида шахмат-шашка мусобақалари, рассомчилик, ҳунармандчилик, бадиий гимнастика, рақс, мусиқа, театр, арқон тортиш, кураш, бодибилдинг ва кўплаб йўналишлар бўйича чиқишлар қилинди.
Очиқ китоб савдолари, ёшларда ватанпарварлик руҳини ошириш мақсадида ҳарбий қуроллар кўргазмаси, меҳнат ярмаркалари бўлиб ўтди. Фаол иштирокчиларга эсдалик совғалари топширилди.
Изоҳ (0)