6 апрель куни соат 02:08 да Қашқадарё вилоятининг Деҳқонобод тумани ҳудудида юк поезди кучли жала оқибатида чўккан темир йўл участкасида тиқилиб қолди. Ҳодиса «Оқработ—Деҳқонобод» темир йўлининг 98-километрида содир бўлди. Бу ҳақда Фавқулодда вазиятлар вазирлиги матбуот хизматига асосланиб, «Газета.uz» хабар бермоқда.
56 та вагондан (уларнинг 26 тасида юк бўлган, 30 таси бўш) темир йўл таркибини бошқариб келаётган иккита электровоз кучли ёғингарчиликлар натижасида 2,5—3 метрга чўккан 50—60 метр узунликдаги участкада тиқилиб қолган. Айни вақтда мазкур темир йўл бўйлаб ҳаракат тўхтатилган; «Ўзбекистон темир йўллари» матбуот хизматининг хабар қилишича, участканинг кечгача таъмирланиши кутилмоқда.
ФВВнинг қайд этишича, манёврли электровоз ёрдамида темирйўлнинг чўккан қисмидан 56 та вагон текис сатҳга олиб чиқилган. Иккита электровозни олиб чиқиш ишлари давом эттирилмоқда. Темир йўл участкасини қайта тиклаш учун «Ўзбекистон темир йўллари»нинг иккита авария-қутқарув поезди, Қарши ҳудудий темир йўл узелининг 180 нафар ходими ва техникалари жалб қилинган.
Изоҳ (0)