Ўзбекистондаги илк осма кўприк лойиҳаси Россиянинг етакчи лойиҳа институти томонидан ишлаб чиқилган

Тошкентда «Наврўз» маданият ва дам олиш боғи қурилиши доирасида, Анҳор канали яқинида Ўзбекистондаги илк осма кўприк қурилиш жараёни якунланмоқда, деб ёзади «Podrobno.uz».

Кўприк лойиҳаси Россия Федерациясининг етакчи лойиҳа институти «Гипростроймост» томонидан ишлаб чиқилган.

«Кўприкнинг кўп босқичли тузилиши икки ҳалқадан иборат бўлиб, улар чексизлик белгисини ҳосил қилади. У пиёдалар маршрутларини ‘Наврўз’ боғи ва Олимпия шон-шуҳрати музейи билан бирлаштирувчи сайр зонасига айланади», — дея таъкидлади «Ўзбекистон темир йўллари».

Кўприк қурилишига «Мостоотряд», «Кўприкқурилиш» маҳаллий корхоналари, «Ўзбекистон темир йўллари» капитал қурилиш дирекцияси мутахассислари, шунингдек Россиянинг «Курганстальмост», «ГиМН», «МостоСтройИнжиниринг» ва бошқа компаниялари вакиллари жалб этилган.

Қурилиш ишларини ташкил этиш устидан назоратни таклиф этилган хорижий мутахассислар амалга оширмоқда.