Олимпиададан сўнг спорт объектлари кўпинча талабгир бўлмай қолади. Туриндаги бинолар ҳам ташландиқ бўлиб қолди — у ерга африкалик қочоқлар кўчиб кириб олди. «РБК» улар Олимпия шаҳарчасида қандай яшашини кўрсатиб берди.
20-Олимпия ўйинлари Туринда 2006 йилнинг февралида ўтказилган эди. Юбилей қишки Олимпиадага мезбонлик қилиш ҳуқуқини Италия шаҳри Швейцариянинг Сьон шаҳрини ортда қолдириб, қўлга киритган эди. Шаҳарда қарийб 65 та спорт объектлари қурилди, шунингдек, метрополитен очилди.
Олимпиада шаҳарни саноат марказидан сайёҳлик марказига айлантириши керак эди. Турин автомобилсозлик пойтахти ҳисобланади: у ерда FIAT, Lancia ва Iveco компаниялари бош қароргоҳлари жойлашган.
Олимпия шаҳарчаси ҳудудида яшаш учун 300 та хонали тўртта бино жойлашган. Дастлаб мусобақалардан кейин уйлар тижорий фойдаланишга топширилиши режалаштирилган эди.
Олимпиададан сўнг бинолар қўллаилмай қолди. 2013 йилда Туриндаги Олимпия шаҳарчасига мингдан ортиқ африкалик қочоқлар жойлаштирилди. Бугунги кунда ташландиқ объектларда 30 мамлакатдан келган муҳожирлар яшайди.
Айни пайтда уйлар ярим ташландиқ ҳолатда бўлиб, таъмирталаб бўлиб қолган. Нозик бетон конструкциялар ва гипс-картон деворлар яшаш учун зарур шароитларни таъминлай олмайди.
2015 йил январида Турин ҳукумати африкалик муҳожирларни Олимпия шаҳарчасидан ҳайдашни бошлади. Лойиҳа доирасида шаҳарчадаги бинолар 2020 йилгача бузиб ташланиши, барча яшовчиларга эса бошқа бошпана, таълим ва иш қидиришда кўмак тақдим этилиши керак.
Изоҳ (0)