Илон Маскнинг SpaceX космик станцияси 31 январь куни навбатдаги ракетани сунъий йўлдош билан бирга учирди, деб ёзади Meduza. Falcon 9 ракетаси Люксембургнинг Gov-Sat 1 коммуникация сунъий йўлдошини орбитага чиқарди.
Компания одатда ўз ракеталарининг биринчи поғоналарини қуруқликка қўндиради ва улардан қайта фойдаланади. Бу сафар эса у поғонани қутқариб қолмаслигини олдиндан маълум қилди.
SpaceX ўзига кераксиз ракета қисми устида альтернатив усулни қўллаб кўришга қарор қилди. Аммо финал босқичда тўққизта двигателдан биттаси эмас, бир йўла учтаси ёнди. Бу мураккаб услуб бўлиб, у ёқилғининг камроқ сарфланишини таъминлайди.
Охир-оқибат, ракета поғонаси қўнишнинг барча босқичларидан муваффақиятли ўтди ва ҳатто сув юзасида қўниш устунларини ҳам чиқарди. SpaceX ходимлари Атлантика океанидан поғонанинг бўлакларини йиғиб олишга тайёр турган эди, бироқ ракета бутунлигича сақланиб, сув юзасида қалқиб қолди.
Илон Маск омон қолган поғонани шатакка олиб, соҳилга чиқаришга уриниб кўришларини айтди.