Месси пенальтиларсиз ҳам тўпурар бўлармиди? Кучли бешликнинг пенальти тепмайдиган голеадорлари

Кучли бешлик миллий чемпионатларида кимлар тўпурар бўлди деган саволни беришдан олдин, улар нечта пенальти тепганди дея сўраш мумкин.

Балки ўша 11 метрликдан йўлланган зарбаларсиз ҳолат умуман бошқача бўлиши мумкиндир? «Championat.asia» нашри шу мавзуга эътиборини қаратди.

Англия — Диего Коста

«Челси» ҳужумчиси мавсум якунига қадар 20 та гол урди ва тўпурарлар рейтингида тўртинчи бўлди. Чемпионат давомида Ҳарри Кейн 29 та, Ромелу Лукаку 25 та, Алексис Санчес эса 24 та гол уришга муваффақ бўлди. Аммо уларнинг голларида пенальтилар ҳиссаси бор. Коста эса 20 та голининг барчасини ўйиндан ура олганди.

Испания — Луис Суарес

Ўтган мавсум кўпчиликни ўзига қаратиб, Месси ҳамда Роналдуни голлари сони бўйича ортда қолдирган уругвайлик футболчи, бу сафар жамоадоши Мессидан камроқ гол урди ва иккинчи бўлди. 8 та кам гол урган бўлса-да, Суарес пенальти тепмагани билан ажралиб турди.

Италия — Гонсало Игуаин

Туриннинг «Ювентус» клубига ўтгани катта шов-шувларни келтириб чиқарган Гонсало Игуаин ҳам А серия тўпурарлари орасида 24 та гол билан тўртинчи бўлди. Эдин Жеко, Дрис Мертенс, Андреа Белотти каби футболчилар пенальти тепгани учун ҳам аргентиналикдан ортда қолди.

Германия — Ариен Роббен

Голландиялик футболчи Роббен 15 та гол урди ва тўпурарлар рейтингида 8-ўриндан жой олди. Обамеянг, Левандовски, Модесте, Вернер, Гомес, Крамарич, Крузе каби футболчилар ундан олдинда, бироқ улар пенальтидан муваффақият қозонган ҳолатлар бор.

Франция — Килиан Мбаппе

Жорий мавсум бутун дунёни ўзига қаратган 18 ёшли футболчи Францияда еттинчи рақамли тўпурар бўлди. Кавани, Ляказетт, Фалкао, Гомис, Сантини каби футболчиларнинг ҳаммасида пенальтидан гол бор.