Трамп Хитой билан муаммолар олдини олиш учун Тайвань раҳбари билан суҳбатлашишдан бош тортди

АҚШ президенти Дональд Трамп Тайвань етакчиси Цай Инвэннинг яна бир марта телефон орқали суҳбатлашиш ҳақидаги таклифини рад этди. Бу ҳақда Reuters агентлигига таяниб, «РБК» хабар бермоқда.

Трамп ўз қарорини Пекин Шимолий Кореяни жиловлашга ёрдам бераётган бир пайтда Хитой президенти Си Цзиньпинга муаммолар яратишни истамаслиги билан изоҳлади.

«Менинг муаммом шундаки, президент Си Цзиньпин билан жуда яхши муносабатларни ўрнатдим», — дейди сиёсатчи агентликка ва Хитой раҳбари Пхеньяннинг янги ракета ва ядро синовлари олдини олишда АҚШга кўмак бериш учун қўлидан келган барча ишни қилаётганлигини ҳақиқатда ҳис этаётганлигини таъкидлади.

«Шу тариқа мен унга бирор бир қийинчилик туғдиришни истамайман», — дея таъкидлади Америка етакчиси.

Трамп Тайвань етакчиси Цай Инвэнь билан 2016 йилнинг декабрида биринчи марта телефон орқали суҳбатлашган эди. 1979 йилдан буён Вашингтон «ягона Хитой» сиёсатига амал қилиб, Пекинни Хитой вакили сифатида тан олиб келганлиги туфайли Associated Press бу суҳбатни «ўта ноодатий» деб атаган эди. Бу суҳбатдан сўнг Пекин АҚШга дипломатик протест билдирган эди.

«Дарё»нинг Telegram’даги расмий канали — @toshqindaryo’га аъзо бўлинг!