АҚШ президенти Дональд Трамп Санкт-Петербургдаги теракт муносабати билан ҳамдардлик билдириш учун Россия президенти Владимир Путинга қўнғироқ қилди, деб ёзади «ТАСС» Россия президентининг матбуот котиби Дмитрий Песковга таяниб. Унинг сўзларига кўра, икки давлат раҳбарлари терроризмга қарши биргаликда курашиш зарурлиги ҳақида умумий фикр билдирган.
«Президентлар терроризм биргаликда курашиш керак бўлган ёвузлик эканлигини таъкидлади… Улар алоқаларни давом эттиришга келишиб олди», — деди Песков.
Оқ уй матбуот хизмати, ўз навбатида, АҚШ президенти телефон суҳбатида Санкт-Петербургдаги терактни қоралаб, айбдорларни жавобгарликка тортишда АҚШнинг ёрдамини таклиф этганини маълум қилди.
Оқ уй, шунингдек, давлатлар етакчилари «терроризм устидан иложи борича тезроқ ва қатъий равишда ғалаба қозониш кераклиги борасида бир фикрга келганини» таъкидлади.