Қорақалпоғистоннинг Элликқалъа тумани ёшларининг туман ҳокими Неъматулла Худойберганов билан учрашуви бўлиб ўтди, деб хабар беради ЎзА.
«Ёшларда тадбиркорлик кўникмасини шакллантиришга кўмаклашиш ва уларни тадбиркорлик фаолиятига жалб қилиш» мавзусида ташкил этилган тадбирда касб-ҳунар таълими муассасаларининг 200 дан ортиқ битирувчиси иштирок этди.
Тадбирда Ўзбекистонда битирувчилар бандлигини таъминлаш, ёшларда тадбиркорлик кўникмасини шакллантириш, уларни кичик бизнес ва хусусий тадбиркорликка жалб этиш орқали мустақил ҳаётда ўз ўрнини топишга кўмаклашишга алоҳида эътибор қаратилаётгани қайд этилди.
2016—2017-ўқув йилида тумандаги олтита касб-ҳунар коллежини 43 йўналиш бўйича 2180 га яқин ўғил-қиз битиради. Уларни иш билан таъминлашда «Камолот» ёшлар ижтимой ҳаракати томонидан ўтказилаётган «Менинг бизнес ғоям», «Ёш тадбиркор — юртга мададкор» лойиҳалари муҳим аҳамият касб этмоқда.
Айни пайтда 200 дан зиёд битирувчи тадбиркорлик фаолияти билан шуғулланиш истагини билдирган. Жумладан, Элликқалъа тиббиёт коллежининг учинчи босқич ўқувчиси Айнура Аннамуратова имтиёзли кредит маблағи эвазига Тоза боғ овулида кутубхона, Шаҳло Маматова Бўстон шаҳрида тикувчилик цехи очиш бўйича ўз бизнес режаларини тақдим этган.
Тадбирда тумандаги «Ягона дарча» маркази, тижорат банклари, туман солиқ инспекцияси ходимлари тадбиркорлик билан шуғулланиш истагида бўлган ёшларга Ўзбекистонда бу борада яратилган имконият ва имтиёзлар тўғрисида атрофлича маълумот берди.
«Дарё»нинг Telegram’даги расмий канали — @toshqindaryo’га аъзо бўлинг!