«Спорт-ТВ» «Динамо» — «Шўртан» ўйинини «Барселона» — «ПСЖ» билан деярли бир вақтда кўрсатади

Бугун — 8 март куни Ўзбекистон Олий лигасида 2-тур беллашувлари старт олиб, унинг доирасида 3 та учрашув бўлиб ўтади.

МТРКнинг «Спорт» телеканали аёллар байрамида бўлиб ўтадиган уч учрашувдан иккитасини кўрсатишга қарор қилди. 16:00 дан бошлаб телеканал эътиборини «Локомотив» ҳамда «Сўғдиёна» клублари иштирокидаги ўйинга қаратиб, уни жонли эфирда намойиш қилади.

Аввалроқ «Локомотив» аёллар учун бир қатор совғалар тайёрлаб қўйгани ҳақида айтиб, уларни стадионга бепул киритишга ваъда берганди.

Самарқандда бўлиб ўтадиган «Динамо» — «Шўртан» учрашуви ҳам 16:00 да старт олади. Шу боисдан «Спорт-ТВ» мазкур ўйинни кечки вақтда ёзиб олинган ҳолда намойиш қилади ва 00:05 дан бошлаб мухлисларга тақдим этади.

Маълумот учун, Самарқанддаги ўйиннинг биринчи бўлими тугамай туриб, UzReport «Барселона» — «ПСЖ» трансляциясини бошлайди. Аввалроқ Самарқанддаги стадионга ҳам нозик жинс вакиллари бепул киритилиши айтиб ўтилганди.

2-турни бугун «Нефтчи» — «Пахтакор» ўйини бошлаб беради. Учрашув 15:00 га тайин қилинган.