«Барселона» Ла лига пешқадамига айланди. Бэйл қизил олган ўйинда «Реал» ўз майдонида 3 та гол ўтказиб юборди
Испания Ла лигасининг 25-турига келиб «Барселона» пешқадамга айланди. Ўз майдонида «Спортинг»ни қабул қилган клуб 5 та гол фарқи билан зафар қучди.
Шу тариқа Каталония клуби очколари сонини 57 тага етказиб олди. Ундан битта кам ўйинда майдонга тушган Мадриднинг «Реал» клуби ҳисобида эса 56 очко бор. Қолдирилган ўйинда «Реал» Вигога ташриф буюриб, «Сельта» билан ҳисоб-китоб қилиши керак бўлади.
Кеча — 1 март куни «Қироллик клуби» ўз уйида 2 очко бой берди. «Лас-Пальмас»га қарши иккинчи бўлимни мезбонлар Гарет Бэйлнинг майдондан четлатилиши сабаб бир киши кам ўтказишга мажбур бўлди.
«Реал»ни мағлубиятдан Криштиану Роналду қутқариб қолди. У аввалига пенальтини аниқ амалга оширган бўлса, ўйин асосий вақти якунига 1 дақиқа қолганида нажот голини уришга эришди.