Фотогалерея: Дунёдаги энг ғаройиб 10 та кўл

Ер сайёраси шу қадар ҳайратланарли жойларга бойки, баъзан уларни кўрган киши ўз кўзларига ишонмайди. AdMe нашри турли рангларда жилоланувчи ғаройиб кўллар фотожамланмасини тақдим этди.

Беш рангли кўл

Минерал тузлар ва сув ўтлари билан мўъжизакор равишда безалган Беш рангли кўлда осмон ва ер акс этади. Унинг ранги вақти-вақти билан сариқдан тўқ яшилгача ўзгаради. Бироқ кўл асосан кўк-олмос рангда бўлади. Унга яқин жойлашган кўплаб кўллардан фарқли равишда кўлнинг суви камаймайди ва қишда музламайди. Шунинг учун бу жой сирларга тўла. Хитойнинг Сычуань провинцияси шимолида жойлашган кўлни маҳаллий аҳоли сеҳрли деб ҳисоблайди.

Пушти кўл

Пушти кўл ёки Ретба кўли Сенегалда жойлашган. Сувнинг ўзига хос ранги туфайли кўл шу номни олган. Бундай ранг сувдаги кўп сонли сианобактериялар (фотосинтезни амалга ошириш қобилиятига эга бактериялар) туфайли юзага келган. Қуёш нурини ютган микроорганизмлар сувнинг рангини ўзгартирувчи пигментлар ишлаб чиқаради. Бу, айниқса, қуруқ мавсумда яққол кўзга ташланади. Кўлда бошқа органик ҳаёт мавжуд эмас – балиқлар ва бошқа сув ости жонзотлари учун туз миқдори жуда юқорилик қилади. Туз сувнинг таркибида 40 фоизни ташкил қилади. Қарийб 50 йилдан буён кўл ҳавзасидан туз қазиб олинади.

Хенераль-Каррера кўли

Жанубий Америкадаги энг чуқур кўллардан бири Чили ва Аргентина чегарасида жойлашган. Кўлдаги сув зумрад-фируза рангдан тортиб денгиз суви ранглари билан жилоланади. Бу фантастик жойда ҳатто осмон кўл сувидек кўк эмас. Кўл ўртасида улкан мармар ғорларнинг қоялари кўзга ташланади. Сув минг йиллар давомида ҳайратланарли лабиринтларни ҳосил қилган.

Нгакоро кўли

Кўл Янги Зеландияда жойлашган ва тўқ яшил жилоланади. Сув ҳавзасининг бундай ранги сув таркибидаги кўп миқдордаги олтингугурт ва темир оксидлари туфайли юзага келган.

Кўзгу кўли

Тузли Уюни – дунёдаги энг йирик қуриган тузли кўл. Унинг майдони 10582 квадрат километр бўлиб, Боливиянинг жануби-ғарбий қисмида жойлашган. У ибтидоий даврдаги кўллар ўзгариши натижасида юзага келган. Ҳисоб-китобларга кўра, кўл ҳавзасида 10 миллиард тонна туз бор. Кўл сув билан қопланадиган кучли ёмғирлар вақтида унинг юзаси ҳақиқий кўзгуга айланади.

Қизил кўл

Лагуна Колорадо – Боливияда жойлашган, майдони 60 квадрат километр бўлган кичик кўл. Сувнинг ранги қизил қон рангидан бинафша ранггача ўзгариши мумкин. Бу кун вақтига ва ҳаво ҳароратига боғлиқ. Сувнинг ноодатий жилосини ультрабинафша нурланишдан ҳимояланиш учун каротин моддаси (каротиноид гуруҳига кирувчи сарғиш пигмент) ишлаб чиқарувчи сувости организмлари юзага келтиради. Кўл минглаб фламинголарнинг севимли жойи ҳисобланади.

Ялтироқ кўл

Ҳайратланарли Гипсленд кўли Австралияда жойлашган. Тунда кўлнинг суви кўк неон рангда жилоланади. Бунинг манбаи биолуминестенсия (ўзидан ёруғлик чиқариш қобилияти) қобилиятига эга сувости тунги ёритгичлар ҳисобланади. Сувнинг юза қисмида тўпланадиган ялтироқ сувости ўтлари фақат океан тубида бўладиган ёруғлик жилосига ўхшаш жилоланишни ҳосил қилади. Ёруғлик чиқарувчи ўсмликларни инсон кўзи кўрмайди.

Келимуту кўли

Кўл Индонезиянинг Флорес оролидаги Келимуту вулқонининг учта кратерида жойлашган. Кўллар нафақат турли рангда, балки уларнинг ранги ўзгариши мумкин. Масалан, қора кўл қизил, кейин фируза ранг, кейин эса яшил тусга кириши мумкин. Кўлнинг ранги сув таркибидаги минерал моддаларга боғлиқ.

Бересса кўли

Калифорнияда жойлашган сунъий кўл ўзининг улкан воронка кўринишидаги ноёб сув чиқариш қурилмаси билан машҳур. Кўринишидан, бу кўл суви қуйиладиган ҳақиқий чуқурга ўхшайди. Чуқурнинг узунлиги 21 метр, эни 22 метрни ташкил қилади.

«Қайнаётган кўл»

Марс сайёрасидаги манзарани эслатувчи кўл АҚШдаги Yellowstone Миллий боғида жойлашган. Катта призма шаклидаги булоқни биринчи бўлиб кашф этганлар кўлни «қайнаётган кўл» сифатида қайд этган. Ёрқин рангдаги бактериялар ва қайноқ булоқ оғзида ҳосил бўлган сувости ўтлари туфайли кўлда камалакнинг барча ранглари тўпланган.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.