2016 йилнинг 1 июнида Швейцарияда Готард темир йўл туннелининг очилиш маросими бўлиб ўтди.
Қурилишига 20 йил вақт сарфланган туннель Швейцария Альпларидаги Сен-Готард тоғ массиви остидан, 2,1 километр баландликдан ўтади. Қурилиш ғояси 1947 йилда пайдо бўлганига қарамай, лойиҳанинг биринчи версияси 1962 йилдагина ишлаб чиқилди. Ўшанда унинг узунлиги 45 километрни ташкил этиши кўзланган эди.
Бурғулаш ишлари 1993 йилда, тайёргарлик ишлари — 1996 йилда, асосий ишлар — 2001 йилда, тупроқни чиқариб олиш эса 2003 йилда бошланди. Лойиҳа қиймати 12 миллиард долларни ташкил этди.
57 километрга чўзилган Готард дунёдаги энг узун туннелга айланди ва илгариги рекордларни янгилади.
Шу муносабат билан «ТАСС» эски рекордчиларни ёдга олди.1. Готард туннели (Швейцария)
Иккита бир томонлама параллель туннелни ўз ичига олади. Ички диаметри — 8,2 метр; ғарбий туннель узунлиги — 56,9 километр, шарқий туннель узунлиги — 57 километр. Тўлиқ узунлиги (пиёда ва хизмат йўлларини инобатга олган ҳолда) — 153,4 километр.
Поездлар ундан 250 километр/соат тезликда ўта олади. Туннель ичида иккита кўп функцияли темир йўл станцияси мавжуд бўлиб, улардан аварияларда ҳамда составларни алмаштиришда фойдаланиш мумкин.
Туннелдан ўтиш вақти — 20 дақиқа.
1 июнда туннелдан илк поездлар ўтди; 2017 йил январида у тўлиқ фойдаланишга топширилади.2. Сэйкан туннели (Япония)
Сангару бўғози остидан ўтиб, Хонсю ва Хоккайдо оролларини бирлаштиради. Умумий узунлиги — 53,85 километр, сув остидаги қисми — 23,3 километр. Йўллар денгиз тубидан 100 метр, денгиз сатҳидан 240 метр чуқурроқ жойлашган.
Тадқиқот ишлари 1954 йилда бошланди, қурилиш ишлари 1964–1988 йиллар орасида давом этди. Очилиш маросими 1988 йилнинг 13 мартида бўлиб ўтди.
Лойиҳа қиймати 690 миллиард иенани (5,4 миллиард доллар) ташкил этди.3. Ла-Манш остидан ўтган Евротуннель (Франция ва Буюк Британия)
Британия оролларини Европанинг континентал қисми билан боғлайдиган, бўғоз остидан ўтган яна бир туннель. Узунлиги — 51 километр, шундан 39 километри бевосита сув остидан ўтади. Энг чуқур нуқтаси сув сатҳидан 126 метр пастроқда жойлашган.
Туннел ғоясини 1802 йилда франциялик муҳандис Альбер Матьё-Фавье айтиб ўтган эди. Қурилиш ишлари 1876 йилда бошланиб, 1883 йилда тўхтатилди. 1987 йилда бурғулаш ишлари қайтадан бошлаб юборилди. 1994 йилнинг 6 майида очилиш маросими бўлиб ўтди.
Лойиҳа қиймати 15 миллиард долларни ташкил этди.4. Эйксунн туннели (Норвегия)
Автомобиль йўли туннели, Норвегиянинг Мёре-о-Румсдал вилоятида жойлашган бўлиб, Харейдландет оролидаги Эйксунн шаҳрини мамлакатнинг континентал қисмидаги Рьянес шаҳри билан боғлайди. Вартдалс-фьорд тубидан, денгиз сатҳидан 287 метр чуқурроқдан ўтказилган. Дунёдаги энг чуқур туннель ҳисобланади.
Узунлиги — 7,8 километр, туннель устидаги тоғ жинсининг энг қалин қисми — 500 метр, энг юпқа қисми — 50 метр.
Қурилиш 2003 йилдан старт олди, ҳаракатланиш эса 2008 йил февралидан бошлаб юборилди. Бугунги кунда туннелдан 25 минг киши фойдаланади.
Лойиҳа қиймати — 970 миллион Норвегия кронаси (123 миллион евро).5. Темза остидан ўтган туннель (Буюк Британия)
Дунёдаги энг серқатнов туннель. У англиялик муҳандис Марк Брюнелнинг лойиҳаси бўйича қурилган. Қурилиш ишлари 1825 йилда бошланиб, 1841 йилда якунланган. Очилиш маросими 1843 йилда бўлиб ўтган.
1869 йилга қадар туннель пиёдалар ҳаракатига мўлжалланган эди. Кўрсатилган йилдан эътиборан у орқали метро поездлари юра бошлади. 2000-йиллар охирида Лондон метрополитенининг Брюнель туннелини ўз ичига оладиган йўналиши реконструкция қилинди.
Изоҳ (0)