Таниқли сўз устаси Обид Асомов Comedy Club гуруҳи ҳамда қизиқчи Аваз Охун ҳақидаги фикрларини баён қилди, деб хабар бермоқда «Дийдор азиз» сайти.
Санъаткор «Shok.uz» сайтига берган интервьюсида Аваз Охуннинг гапларига умуман кулмаганини айтди.
«Фарзандларим билан Аваз Охуннинг концертига тушдик, қизим кулди, билмадим, мен умуман кулмадим. У мени кулдира олмади», — деди сўз устаси.
Шунингдек, у замонавий Comedy Club’чилар борасидаги фикрини ҳам очиқ-ойдин айтди:
«‘Клуб’ сўзининг ўзи айтиб турипти — улар айтаётган ҳазиллар кичкина клуб, тор доирага мўлжалланган. Лекин улар 4300 нафар одам тўла залда бепарда гапларни айтишлари умуман маданиятимизга тўғри келмайди. У ерда қиз пошшалар, уйланмаган йигитлар бор, уларнинг ҳазилларини оилавий ўтириб эшитиб бўлмайди. Бу йўлдан аввал АҚШ, Россия ҳам ўтган. Ҳатто улар ҳам шармсиз ҳазиллардан зериккан».
Шунингдек, журналистнинг «тўйларга юряпсизми?» деган саволига Асомов «Албатта, бўлмаса бола-чақамни ким боқади?» деб жавоб қайтарди.
«Дарё» изоҳи: Ўзбекистонда Comedy Uz номли лойиҳа фаолият юритиб келаётганини инобатга олсак, санъаткор ушбу ўринда, Comedy Club ҳақида гапирар экан, айнан Comedy Uz’ни назарда тутган бўлиши мумкин.