Немис полицияси машинасига айлантирилган Chevrolet Corvette намойиш этилди (фото)

Германиянинг TIKT Performance фирмаси мамлакат транспорт вазирлиги ва маҳаллий автомобиль тюнерлари ассоциацияси буюртмасига кўра ягона нусхада Chevrolet Corvette полиция купесини тайёрлади. Машина Эссенда бўлиб ўтган тюнинг-шоуда намойиш этилди. Бу ҳақда Motor хабар бермоқда.

Автомобиль «хавфсиз тюнинг»ни тарғиб этувчи Tune it! Safe! ижтимоий кампанияси доирасида тайёрланди. Лойиҳанинг расмий сайтида билдирилишича, «хавфсиз тюнинг» деганда автомобилни хавфсизликка дахл қилмайдиган, сифатли эҳтиёт қисмларидан фойдаланган ҳолатда мукаммаллаштириш назарда тутилади.

TIKT Performance Corvette’га карбонли аэродинамик тўсгич, 20 дюймли ғилдирак дискини ўрнатди, салонда полиция рацияси пайдо бўлди. Двигатель ўзгаришсиз қолган: капот остига 6,2 литрли, 466 от кучига эга, автомобилни соатига 100 километр кўрсаткичга 3,8 сонияда эришисиҳга имкон берувчи «саккизталик» ўрнатилган.

Еттинчи авлод Chevrolet Corvette — Stingray илк бор 2013 йилда намойиш этилган, кейинчалик Z06 ва C7.R версиялари пайдо бўлганди.