Савдо ва саноат бўйича Ўзбекистон-Британия кенгашининг 22-йиғилиши жорий йилнинг 18 ноябрида Лондонда бўлиб ўтди, дея хабар бермоқда Британиянинг Тошкентдаги элчихонаси матбуот хизмати.
ЎБССКнинг 22-йиғилиши Буюк Британия томонидан кенгаш ҳамраиси Авлиё Михаил ва Авлиё Георгий, Қиролича Виктория ва Британия Империясининг Аъло ордени соҳиби Барбара Ҳей раислигида бўлиб ўтди. Ўзбекистондан ташриф буюрган, иқтисодиётнинг турли соҳа вакилларидан ташкил топган Ўзбекистон делегациясига эса Ўзбекистон Республикаси Ташқи ишлар вазирининг биринчи ўринбосади Жавлон Ваҳобов бошчилик қилди.
Учрашув давомида Ўзбекистон делегацияси британиялик ҳамкорларни мамлакатнинг тадбиркорлик ва иқтисодий муҳит ҳамда нефть-газ, кимё, фармацевтика, энергетика, кончилик, озиқ-овқат саноати каби соҳаларда икки-томонлама савдо-иқтисодий алоқаларни ривожлантириш имкониятлари ҳақида бохабар қилди.
Бундан ташқари, 80 га яқин Британия корхоналари вакиллари Ўзбекистонда бир қатор инвестиция лойиҳаларида иштирок этиш имкони ҳамда Республика ҳукуматининг тузилмавий ислоҳотлар, саноатни модернизациялаш ва диверсификациялаш, шунингдек, инфратузилмаларни ривожлантириш ва хусусийлаштириш борасида стратегик дастурларини амалга оширишга қаратилган ҳаракатлари ҳақида маълумот олди.
Анжуман доирасида Британия корхоналари ҳам Ўзбекистоннинг саноати, илм-фан ва таълим каби турли соҳаларига таклиф қила оладиган имкониятларни Ўзбекистон томони вакилларига намойиш қилди.
Буюк Британия ва Ўзбекистон делегациялари вакиллари ўрнатилган алоқаларни Ўзбекистоннинг Лондондаги элчихонаси томонидан ўтказилган қабул маросими давомида мустаҳкамлади.
Шунингдек, Ташқи ишлар вазирининг биринчи ўринбосари Жавлон Ваҳобов Буюк Британияга ташрифи доирасида Буюк Британиянинг Ташқи ишлар вазири ўринбосари жаноб Тобиас Эллвуд билан учрашди.
Изоҳ (0)