Бугун бўлиб ўтадиган футбол бўйича Европа Чемпионлар лигаси финалида ғалаба қозонадиган жамоа «олтин хет-трик»ни расмийлаштиради – «Ювентус» ҳам, «Барселона» ҳам ўз миллий чемпионати ва кубок баҳсларида ғолибликни қўлга киритиб бўлди, шу сабаб Чемпионлар лигасидаги муваффақият мазкур клубларнинг исталган бири учун мавсумдаги учинчи соврин бўлади, дея хабар бермоқда RBC.ru.
Агар «Барселона» ғалаба қозонадиган бўлса, жамоа ўз тарихида иккинчи марта «олтин хет-трик»ни расмийлаштиради – жамоа бунгача 2008/2009 йилги мавсумда барча совринларни қўлга киритганди. «Барселона»дан ташқари «Манчестер Юнайтед» (1999), «Интер» (2010) ва «Бавария» (2013) ҳам шундай ютуқларга эришган. «Селтик» (1967), «Аякс» (1972) ва «ПСВ» (1988) жамоалари ҳам бир мавсумда учта совринни қўлга киритган, бироқ бу вақтда Чемпионлар лигаси ўрнида Чемпионлар кубоги мусобақалари ўтказиларди.
«Барселона»нинг энг кучли ўйинчиси Лионель Месси Чемпионлар лигаси финалида рекорд ўрнатиши мумкин. Агар аргентиналик футболчи «Ювентус» дарвозасига гол урса, учта финалда гол урган илк ўйинчига айланади. Бунгача у 2009 ва 2011 йилги финалларда «Манчестер Юнайтед»га гол урган. Шунингдек, ўйин «Барселона»нинг ғалабаси билан тугаса, Андрес Инеста Чемпионлар лигасида ғолиб чиққан иккинчи ўйинчига айланади. Бунгача фақат Кларенс Зеедорф шундай натижа қайд этган.