Футбол бўйича Ўзбекистон ёшлар терма жамоаси 7 июнь, якшанба куни Янги Зеландияда давом этаётган жаҳон чемпионати гуруҳ босқичи доирасида Фижига қарши сўнгги тур учрашувини ўтказади. Uff.uz’нинг қайд этишича, кейинги босқичга чиқиш учун Равшан Ҳайдаров шогирдлари мазкур ўйинда Фижини мағлуб этишлари шарт.
Фижи терма жамоаси ҳужумчиси Иосефо Веревунинг сўзларига кўра, Ўзбекистон ёшлар терма жамоаси ҳақида етарлича маълумот олинган. «Термангизни гуруҳ фоворитларидан бири дейишганди. Негадир, бунақа эмасга ўхшайди. Балки, кейинги ўйинларда футболчиларингиз «очилиб» кетишар, лекин икки ўйин таҳлилига кўра, Ўзбекистон ўртача даражадаги терма сифатида хотирамда муҳрланди. Аммо, энди сизда йўқотадиган нарса қолмади. Термангиз сўнгги ўйинда борини ташласа керак», - деди ҳужумчи.
Футболчининг сўзларига кўра, Фижи терма жамоаси олдига жаҳон чемпионати кучли саккизлигидан ўрин олиш вазифаси қўйилган. «Германияга қарши ёмон ўйнамагандик. Фақатгина биринчи икки голдан сўнг жамоадошларим бир-бирларини тушинмай эсанкираб қолишди. Кейин, иккинчи ўйинда ўзимизга келдик ва керакли натижани қайд этдик. Албатта, номига қатнашмасдан камида кучли саккизликдан ўрин олиш вазифасини олганмиз. Балки, ундан кўпроғига ҳам эришармиз», - деди Вереву.
«Биз учинчи ўйинда Ўзбекистонни мағлубиятга учратамиз ва плей-оффга иккинчи ўринни олиб чиқамиз», - дея қўшимча қилди Фижи терма жамоаси ҳужумчиси.
Эслатиб ўтамиз, Ўзбекистон ёшлар терма жамоаси гуруҳ босқичи 1-турида Гондурас термасига 3:4, 2-турида эса Германияга 0:3 ҳисобид имкониятни бой берди. Фижи эса 1-турда Германия томонидан 1:8 ҳисобида тор-мор этилган бўлса-да, 2-турда кутилмаганда Гондурасни йирик – 3:0 ҳисобида таслим этди.