Farg‘ona viloyatida 270 dona uyali aloqa vositalarining noqonuniy aylanmasiga chek qo‘yildi, deb xabar beradi viloyat bojxona boshqarmasi matbuot xizmati.
Qayd etilishicha, Farg‘ona viloyati bojxona boshqarmasi va Bojxona qo‘mitasi Kontrabandaga qarshi kurashish xodimlari Shaxsiy xavfsizlik sho‘basi xodimlari bilan hamkorlikda Farg‘ona tumanida tezkor tadbir o‘tkazilgan.
Tadbir davomida ushbu tuman hududida harakatlanayotgan Cobalt rusumli avtotransport vositasi fuqaro yashash xonadoni oldiga to‘xtagan vaqtida ushlanib, avtotransport vositasi va xonadon belgilangan tartibda ko‘zdan kechirilgan. Natijada, bojxona rasmiylashtiruvidan o‘tganini tasdiqlovchi hujjatlari bo‘lmagan umumiy qiymati 367 million so‘mlik ikki turdagi jami 270 dona uyali aloqa vositalari borligi aniqlangan.
Holat yuzasidan tergovga qadar tekshiruv harakatlari olib borilmoqda.
Mart oxirlarida Jalolobod viloyatida yashovchi fuqaroning uyida Qirg‘iziston va O‘zbekistonni bog‘lovchi tunnel aniqlangani to‘g‘risida xabar berilgandi. Davlat xavfsizlik xizmatiga ko‘ra, ushbu tunnellardan mobil telefon va zargarlik buyumlari noqonuniy ravishda olib o‘tishda foydalanilgan.
Izoh (0)