Navoiyda mashinasida portlovchi moddalar olib ketayotgan shaxs qoʻlga olindi. Bu haqda “Zamon” informatsion dasturida xabar qilindi.
Qayd etilishicha, Nurota tumanida oʻtkazilgan tezkor tadbirda samarqandlik muqaddam sudlangan 42 yoshli fuqaroga tegishli avtomashina gumonlanib toʻxtatib tekshirilganda, salonda mahalliy korxonalar tomonidan ishlab chiqarilgan kukun holatidagi va tayyor holatga keltirilgan portlovchi moddalar borligi aniqlandi.
Mazkur ashyolar olib yurish, tashish hamda sotish taqiqlangani bois tadbir ishtirokchilari tomonidan rasmiylashtirib olindi.
Maʼlum boʻlishicha, ushbu portlovchi moddani gumonlanuvchi tarkibida tilla boʻlgan togʻ jinslarini qazib olishda foydalanmoqchi boʻlgan.
Holat yuzasidan fuqaroga nisbatan Jinoyat kodeksining tegishli moddasiga asosan ish qoʻzgʻatilib, tergov harakatlari olib borilmoqda.
Avvalroq Jizzaxda chorva ogʻilxonasida qum zarralaridan oltin ajratish bilan shugʻullanayotgan tadbirkor fosh boʻlgandi.
U oʻzi rahbarlik qilib kelayotgan xususiy korxona hududida tashkil etilgan koʻchma sex orqali oltin zarralari bor toshlarni maydalab, qimmatbaho metall ajratib olgan.
Boshqa bir holatda esa, Buxoro viloyatining Shofirkon tumanida noqonuniy oltin qazish bilan shugʻullangan 37 kishi qoʻlga tushgandi.
Ushbu holatda noqonuniy qazish ishlari ortidan davlat va jamiyat manfaatlariga 20 milliard soʻmdan ortiq zarar yetkazilgan.
