Navoiy viloyatining Uchquduq tumanida oziq-ovqat va qurilish mollari savdo do‘konlari hamda omborxonada yong‘in chiqdi. Bu haqda viloyat FVB matbuot xizmati xabar berdi.
16-iyun kuni soat 18:35 da “Mustaqillik” MFY Amir Temur ko‘chasida joylashgan “El Baraka Ul Haq” MCHJ hamda Lider Bazar YTT ga tegishli oziq-ovqat va qurilish mollari savdo do‘konlari hamda omborxonasi yonayotgani to‘g‘risida FVBga xabar kelib tushgan. Xabarga ko‘ra, voqea joyiga Uchquduq tumani FVB hamda NKMK AJ hamda “Navoiyuran” DK OFVB dan jami 6 ta yong‘in-qutqaruv ekipaji jalb etilgan.
Yong‘in oqibatida savdo va qurilish mollari do‘konlarining taxminan 300 kvadrat metr maydoni yonib zararlangan, savdo do‘konlarining 2 ming kvadrat metr maydoni yong‘indan saqlab qolingan. Tan-jarohati olgan fuqarolar to‘g‘risida ma’lumot kelib tushmagan.
Shu kuni soat 22:16 da Farg‘ona viloyati Yozyavon tumanidagi noturar qarovsiz bino sodir bo‘lgan yong‘in oqibatida ikki kishi halok bo‘ldi, uch kishi turli darajadagi tan jarohatlari oldi. Bino oldida turgan uchta avtomobil ham yonib ketgan.
