Prezident Shavkat Mirziyoyev 3-sentyabr kuni AQSH Kongressi senatori, Senatdagi Markaziy Osiyo bo‘yicha kokus hamraisi Stiv Deynsni qabul qildi.
Uchrashuv avvalida AQSH senatori Shavkat Mirziyoyev va O‘zbekiston xalqini mamlakat mustaqilligining 35 yilligi bilan tabriklab, tinchlik-osoyishtalik, farovonlik va ravnaq tiladi.
Tomonlar O‘zbekiston va AQSH o‘rtasidagi strategik sheriklikni yanada mustahkamlash hamda parlamentlararo hamkorlikni rivojlantirish masalalarini ko‘rib chiqdi. So‘nggi yillarda ikki tomonlama aloqalar yuqori darajaga ko‘tarilgani, muloqotlar va delegatsiyalar almashinuvi faollashgani qayd etildi.
Savdo-iqtisodiy va investitsiyaviy hamkorlikni kengaytirishga ham alohida e’tibor qaratildi. Energetika, muhim minerallar, transport, qishloq xo‘jaligi, raqamli texnologiyalar va sanoat sohalarida yirik loyihalar amalga oshirilayotgani ta’kidlandi.
Shuningdek, hududlar o‘rtasidagi aloqalarni, xususan, senator vakili bo‘lgan Montana shtati bilan hamkorlikni rivojlantirish istiqbollari muhokama qilindi. “C5+1” formatidagi hamkorlik va xalqaro hamda mintaqaviy ahamiyatga ega dolzarb masalalar yuzasidan ham fikr almashildi.
