AQSH prezidenti Donald Tramp o‘z harbiylarining ogohlantirishlariga qaramay, Eronga qarshi quruqlikdan cheklangan hujum uyushtirish haqida buyruq berishi mumkin. Bu haqda Pokiston maxsus xizmatlari ma’lum qildi.
Islomoboddagi xavfsizlik manbalariga ko‘ra, ushbu xulosa hozirgi harbiy kuzatuvlarga asoslangan. Ekspertlar amerikalik harbiylarning Eronga bostirib kirishini juda xavfli deb hisoblamoqda. Chunki desant kuchlari raketa va dron hujumlariga duch kelishi tayin.
Shuningdek, mutaxassislar Eronni “tabiiy qal’a” deb atamoqda. Tog‘lar va issiq cho‘llar qo‘shinlarning ilgarilashini juda qiyinlashtiradi.
“Noqulay hudud harbiylarni bostirib kirish haqida ikki marta o‘ylab ko‘rishga majbur qilishi kerak”, deyiladi AQSH Harbiy-dengiz instituti tahlilida.
Institut bunday sharoitda quruqlikdagi qo‘shinlarning imkoniyatlarini “imkonsiz” deb baholamoqda. Texnikalar, jumladan, tanklarning tez ishdan chiqishi ham qo‘yilgan maqsadlarga erishishni qiyinlashtiradi.
Kuchlar nisbati
Raqamlar ham Eron rejimining ustunligini ko‘rsatmoqda. Tehron ixtiyorida 610 ming nafar amaldagi harbiy va harbiylashtirilgan birikmalar hamda 350 ming nafar zaxiradagi askar bor. Quruqlikdagi operatsiya AQSH uchun oqibati noma’lum bo‘lgan og‘ir sinovga aylanishi mumkin.
Buning ustiga Tramp o‘z xalqiga ushbu operatsiyani tushuntirib berishi kerak bo‘ladi. Reuters o‘tkazgan Ipsos so‘rovnomasiga ko‘ra, AQSH fuqarolarining bor-yo‘g‘i uchdan bir qismi harbiy operatsiyani qo‘llab-quvvatlamoqda. Respondentlarning 69 foizi Tramp harbiy aralashuvdan ko‘zlangan maqsadlarni yetarlicha aniq tushuntirib bermagan deb hisoblaydi.
Muzokaralar va Eron pozitsiyasi
Manbalarning bildirishicha, Pokiston va Qatar Vashington hamda Tehron o‘rtasida takliflarni yetkazishda yana vositachilik qilmoqda. Biroq Eron vaqtincha emas, doimiy otashkesim tuzilishini talab qilmoqda.
Shuningdek, Eron harbiylari AQSHni quruqlikdagi hujumdan ogohlantirdi. Tehron bunday operatsiyaga to‘liq tayyor ekanini bildirdi. Ayni paytda, Tramp 29-iyul kuni Iordaniyadagi Amerika harbiy bazasiga berilgan hujumiga javoban AQSH Eronga zarbalar berishni boshlashini aytdi.
