Hakerlar Keniya prezidenti Uilyam Rutoning rasmiy saytiga buzib kirdi. Ular bosh sahifaga haqoratli xabarlar va bitkoinlarda to‘lov qilish talabini joylashtirdi. Bu haqda Kenyans.co xabar berdi.
Hakerlar saytda ko‘rsatilgan kriptohamyonga beshta bitkoin (taxminan 320 ming dollar) o‘tkazishni talab qilgan. Aks holda, ular prezident haqida obro‘sizlantiruvchi ma’lumotlarni e’lon qilishini bildirgan.
Uilyam Ruto ma’muriyati saytga buzib kirish faktini tasdiqladi va hozirda IT mutaxassislari hakerlik hujumi oqibatlarini bartaraf etish bilan shug‘ullanayotganini ma’lum qildi.
Keniya axborot va kommunikatsiya texnologiyalari vaziri Uilyam Kabogoning aytishicha, hukumatning maxfiy ma’lumotlariga zarar yetmagan.
“Hozirda maxfiy ma’lumotlarga ruxsatsiz kirish, ma’lumotlarning sizib chiqishi yoki yo‘qolishi haqida hech qanday dalil yo‘q. Davlat tizimlari va raqamli xizmatlar himoyalangan hamda odatdagi tartibda ishlashda davom etmoqda”, dedi u.
Ehtiyot chorasi sifatida qayta tiklash ishlari uchun saytga kirish cheklangan.
Avvalroq Shimoliy Koreya hakerlari tarixdagi eng yirik kiberjinoyatni sodir etgandi. Hakerlar 2025-yil davomida 2 milliard dollarga teng kriptoaktiv o‘g‘irlagan. Mazkur rekord darajadagi o‘g‘rilik G‘arb davlatlari va BMTga ko‘ra, mamlakat yadro quroli va raketa dasturlarini moliyalashtirish uchun ishlatilayotgan bo‘lishi mumkin. Eng katta talonchilik fevral oyida Dubayda joylashgan Bybit kriptobirjasiga qilingan hujumda qayd etilgan. Unda hakerlar 1,5 milliard dollarlik Ethereum tokenlarini o‘g‘irlagan.
