AQSH, Kanada va Meksika yashil maydonlarida bo‘lib o‘tayotgan Jahon chempionatining 1/8 final bosqichi yakunlangach, Opta statistik portali turnir g‘olibligi uchun da’vogarlar reytingini yangiladi.
Hisob-kitoblarga ko‘ra, Fransiya milliy jamoasining chempionlik imkoniyati avvalgiga nisbatan yana biroz pasaygan bo‘lsa-da (27,32 foiz), ular hamon asosiy favorit bo‘lib turibdi. Ispaniya milliy jamoasi 21,33 foizlik imkoniyat bilan ikkinchi o‘rinni band etgan. Eng asosiy o‘zgarish uchinchi pog‘onada yuz berdi: amaldagi Jahon chempioni Argentina o‘z imkoniyatlarini 17,28 foizga oshirib, Angliya milliy jamoasini (16,48 foiz) ortda qoldirdi va yana kuchli uchlikka qaytdi.
Quyi o‘rinlarda ham o‘zgarishlar kuzatilgan. Xususan, Shveysariya o‘z imkoniyatlarini biroz yaxshilab, Marokash va Belgiyani ortda qoldirgan holda 6-o‘ringa ko‘tarilib oldi.
Superkompyuter talqiniga ko‘ra, JCH-2026 g‘olibligi uchun jamoalarning yangilangan imkoniyatlari quyidagicha:
- Fransiya — 27,32%
- Ispaniya — 21,33%
- Argentina — 17,28%
- Angliya — 16,48%
- Norvegiya — 6,57%
- Shveysariya — 3,78%
- Marokash — 3,66%
- Belgiya — 3,58%
Asosiy da’vogar hisoblangan Fransiya milliy jamoasi shu vaqtgacha o‘tkazilgan beshta o‘yinning barchasida g‘alaba qozondi. To‘plar nisbati esa ko‘pchilikni hayratda qoldirmoqda — 14:2. Fransuzlar turnir davomida ketma-ket Senegal (3:1), Iroq (3:0), Norvegiya (4:1), Shvetsiya (3:0) va Paragvay (1:0) milliy jamoalarini mag‘lubiyatga uchratdi.
Ma’lumot o‘rnida, 2026-yilgi Jahon chempionati 19-iyulga qadar AQSH, Kanada va Meksika maydonlarida bo‘lib o‘tadi.
