Jahon chempionatining pley-off bosqichi doirasida navbatdagi uchrashuvlar bo‘lib o‘tdi. Ushbu o‘yinlarda muxlislar ham drama, ham kutilmagan sensatsiyaning guvohiga aylandi.
Braziliyaning irodali g‘alabasi
Braziliya va Yaponiya milliy terma jamoalari o‘rtasidagi qarama-qarshilik kutilmaganda osiyoliklarning ustunligi bilan boshlandi. 29-daqiqada Kayishu Sano darvozani ishg‘ol qilib, Yaponiyani hisobda oldinga olib chiqdi.
Ikkinchi bo‘limda vaziyatni o‘nglashga harakat qilgan braziliyaliklar 56-daqiqada Kazemironing goli evaziga muvozanatni tiklashga erishdi (1:1). O‘yinning asosiy vaqti durang bilan tugashi kutilayotgan bir pallada, hakam tomonidan qo‘shib berilgan 5-daqiqada (90+5) Gabriel Martinelli g‘alaba golini kiritib, jamoasini musobaqaning navbatdagi bosqichiga olib chiqdi.
Germaniyaning mag‘lubiyati
Kunning ikkinchi muhim o‘yinida Germaniya hamda Paragvay terma jamoalari o‘zaro bahs olib bordi va unda JCH-2026 ning eng yirik sensatsiyasilaridan biri qayd etildi.
O‘yin murosasiz kurashlar ostida kechdi. Birinchi taym so‘ngida (42-daqiqa) paragvaylik Xulio Ensiso hisobni ochgan bo‘lsa, ikkinchi taym boshida (54-daqiqa) Kay Haverst muvozanatni tikladi — 1:1. O‘yinning asosiy hamda qo‘shimcha taymlarida g‘olib nomi aniqlanmagach, jamoalar penaltilar seriyasiga murojaat qildi.
Penaltilar seriyasida omad Janubiy Amerika vakillariga kulib boqdi. Paragvayliklar 4:3 hisobida zafar quchib, o‘z yurishini davom ettiradigan bo‘ldi. Mundialning asosiy favoritlaridan biri sanalgan Germaniya terma jamoasi esa Jahon chempionati bilan xayrlashdi.
Jahon chempionati
1/16 final bosqichi
Braziliya — Yaponiya 2:1
Gollar: 0:1 — Sano (29), 1:1 — Kazemiro (56), 2:1 — Martinelli (90+5)
Germaniya — Paragvay 1:1 (penaltilar seriyasi 3:4)
Gollar: 0:1 — Xulio 942), 1:1 — Haverts (54)
Turnir setkasiga ko‘ra, g‘alaba qozongan jamoalarning 1/8 finaldagi ehtimoliy raqiblari ham ma’lum. Xususan, Paragvay terma jamoasi navbatdagi bosqichda Fransiya hamda Shvetsiya uchrashuvi g‘olibi bilan kuch sinashadi. Ushbu bahs 5-iyul kuni soat 02:00 da bo‘lib o‘tishi belgilangan bo‘lsa, Braziliya terma jamoasi 1/8 finalda Kot-d’Ivuar va Norvegiya juftligi g‘olibiga qarshi maydonga tushadi. Mazkur o‘yin esa 6-iyul kuni soat 01:00 ga belgilangan.
