2026-yilgi Jahon chempionatining “E” guruhi 1-turi doirasida Germaniya va Kyurasao terma jamoalari o‘rtasidagi uchrashuv yakunlandi. AQSHning Xyuston shahridagi “NRG” stadionida bo‘lib o‘tgan bahsda Germaniya 7:1 hisobida yirik g‘alabaga erishdi.
O‘yinning 6-daqiqasida Feliks Nmecha hisobni ochib, Germaniyani oldinga olib chiqdi. 21-daqiqada Livano Komenenchia muvozanatni tikladi. 38-daqiqada Niko Shlotterbek “bundestim”ning ikkinchi goliga mualliflik qildi. Birinchi bo‘limga qo‘shib berilgan 45+5-daqiqada Kay Haverts penaltini aniq amalga oshirib, hisobni 3:1 ko‘rinishiga keltirdi.
47-daqiqada Jamol Musiala Germaniyaning to‘rtinchi golini urdi. 68-daqiqada Nataniel Braun beshinchi golni kiritdi. 78-daqiqada Yozua Kimmixning uzatmasidan so‘ng Deniz Undav hisobni 6:1 ko‘rinishiga keltirdi. 88-daqiqada esa Kay Haverts dubl qayd etib, Germaniyaning uchrashuvdagi yettinchi goliga mualliflik qildi.
Mazkur g‘alabadan so‘ng Germaniya 3 ochko bilan “E” guruhi peshqadamiga aylandi. Debyutant Kyurasao esa ochkosiz holda to‘rtinchi o‘rinda qoldi. Ekvador va Kot-d’Ivuar terma jamoalarining 1-turdagi o‘zaro bahsi 01:00 da start oladi.
2-turda Germaniya Kot-d’Ivuar bilan (20-iyun), 3-turda esa Ekvador bilan (25-iyun) bahs olib boradi. Kyurasao 2-turda Ekvadorga (21-iyun), 3-turda esa Kot-d’Ivuarga (25-iyun) qarshi maydonga tushadi.
Guruh bosqichi 11–27-iyun kunlari davom etadi. Jamoalar o‘zaro bir davrali tizimda uchta o‘yin o‘tkazadi. Pley-off bosqichiga har bir guruhdan eng yaxshi ikki jamoa, shuningdek, uchinchi o‘rinni egallagan sakkizta eng yaxshi terma jamoa yo‘l oladi.
