Davlat xavfsizlik xizmati Namangan viloyatida tergovchi va advokatning pora bilan bog‘liq noqonuniy harakatlariga chek qo‘yilganini ma’lum qildi.
Qayd etilishicha, viloyat IIB Tergov boshqarmasi tergovchisi Chust tumanida yashovchi 2006-yilda tug‘ilgan fuqaroga nisbatan qo‘zg‘atilgan jinoyat ishini uning foydasiga hal qilib, tugatib berish evaziga 40 ming dollar talab qilgan. Tergovchi ushbu mablag‘ni ishga aloqador bo‘lmagan advokat orqali olmoqchi bo‘lgan.
DXX xodimlari tomonidan Chust tumanida o‘tkazilgan tezkor tadbirda advokat gumonlanuvchining otasidan 40 ming dollarni olayotgan vaqtida ashyoviy dalillar bilan ushlandi. Shundan so‘ng tadbir davom ettirilib, advokatdan 30 ming dollarni olayotgan paytda tergovchi ham qo‘lga olindi.
4-iyun kuni Toshkent viloyatining Yangiyo‘l tumanida joylashgan davlat zaxirasidagi yerni 750 ming dollarga sotmoqchi bo‘lgan shaxs ushlangani haqida ham xabar berilgandi. Hozirda unga nisbatan jinoyat ishi qo‘zg‘atilib, tergov harakatlari olib borilmoqda.
